《ERROR自肥企画》癲喪環節停不了 阿Dee連續兩集下體重創慘慘豬

「宇宙天團」ERROR以搞笑無厘頭風格殺出血路，過往唔少綜藝節目都深得網民喜愛。佢哋嘅全新綜藝節目《ERROR自肥企画》喺星期一（3日）播出首集後，隨即被網民瘋狂洗版留言，節目更火速登上ViuTV最多人睇節目嘅第一位，真係非常犀利呀！而家就睇大家睇下呢三集嘅精彩環節啦！

主題曲由《新世紀福音戰士》改篇
《ERROR自肥企画》第一集首先搵ERROR成員扮演成日本人氣動漫《新世紀福音戰士》角色，阿Dee扮碇真嗣、肥仔扮碇真嗣爸爸碇源堂、193反串扮綾波麗，而保錡就扮演巨大機械人（EVA初號機），製作組仲搵咗陳欣妍扮葛城美里，及沈殷怡扮赤木律子，各人都扮演得維肖維妙。另外，節目更用動漫嘅主題曲《殘酷天使的行動綱領》改編成《無制限OT編集団の行動綱領》，由「格仔導演」Mike（劉諾衡）主唱，歌詞雖然唔啱音，不過成件事搞笑得嚟又熱血，所以網民都話唔知聽咗啲咩，不過就好鍾意，同埋會不停Loop。

繼續炸Sound Bear
有睇開《花姐ERROR遊》嘅朋友就知道，炸ViuTV吉祥物「生啤」（又名Sound Bear）係佢哋嘅傳統，所以今次《ERROR自肥企画》都唔例外。ERROR四子被帶到Sound Bear雕塑前，雖然佢哋都心知不妙，不過都喺Sound Bear被炸爛時嚇親，肥仔連假鬚都甩埋。

換白色「精子」服裝
炸完Sound Bear後，佢哋正式玩第一個遊戲「Big壁精奴」，ERROR成員被安排換上白色「精子」服裝，各人就選擇一道發泡膠門，然後就衝過去，結果由阿Dee（何啟華）勝出，奪得一千蚊現金獎。

「死亡恆星」射下體
去到第二集，製作組就諗咗一個更加癲喪嘅遊戲。呢個「友情試煉」環節，ERROR成員與其好友化身「任何人」，穿上由頭黑到落腳嘅緊身衣服，然後再由ERROR成員估邊個係佢嘅隊友，而被選中嘅人就要被圓球物體彈射下體。雖然只要193估唔出隊友，不過最慘嘅係阿Dee，因為佢係唯一一個被彈中下體嘅人。最後遊戲由保錡勝出，成功獲得價值三千蚊嘅公路單車。

底褲塞氣球玩爆破
創意無限嘅製作組，喺三集就玩經典環節「ERROR流忍者」，但由於阿Dee要出席電影宣傳所以就搵咗同佢好似樣嘅陳海寧（Isabella）代替。喺遊戲中，做惡鬼嘅保錡需要保護氣球，同埋擊落航拍機，而做忍者嘅Isabella、肥仔同193就要用航拍機刺穿6個氣球，結果由保錡勝出。諗住咁樣就「本集完」？少年你實在太年輕啦！最癲喪嘅環節喺後頭，回歸節目嘅阿Dee，突然被隊友和製作人員捉住，要佢接受「忍術制裁」，即係要佢只著上底褲同襠布，然後塞入氣球泵氣，最後氣球喺褲內爆破。噚晚節目播出時喺打咗格仔，不過Mike導及ERROR成員都有將「無碼」片段放上社交網站，而阿Dee更搞笑出PO留言話：「上世做錯事 今世ViuTV」，成功吸引唔少網民都留言支持佢，例如「隔住個mon都feel到痛 但我真係笑到癲左」、「支持何啟華一哥」及「笑死，支持一哥」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！