《ERROR自肥企画》被查小欣批低俗不雅 193還擊：起碼我哋做嘅節目冇被腰斬過

ViuTV綜藝節目《ERROR自肥企画》內容尺度大膽又有創意，自開播以來喺網上討論程度爆晒燈。除咗ERROR成員何啟華（阿Dee）、梁業（肥仔）、郭嘉駿（193）及吳保錡人氣飆升之外，幕後團隊「無制限OT編集団」成員亦獲得網民高度關注。早前自稱「娛樂教母」嘅查小欣喺娛樂專欄點名批評《ERROR自肥企画》大玩低俗不雅內容，有不良意識之嫌。佢亦指ViuTV係一個入屋嘅免費電視台，一定要有社會責任。專欄一出後，引起唔少網民熱烈討論，而193亦有喺IG開直播時提及查小欣嘅評論。

一向敢言嘅193喺IG開直播時，除咗宣傳首支個人單曲《睡到三點》及同網民傾計講近況之外，佢亦講到查小欣嘅評論話：「查小欣話我意識不良，我唔知，但一個人如果冇睇過節目就批評人意識不良，我覺得係佢個人不良。同埋起碼我哋做嘅節目冇被腰斬過，佢做嘅節目係咪有腰斬過，點解會被人腰斬嘅？」佢亦喺直播中話︰「接受唔到新事物嘅人，建議你唔好看ViuTV，唔好留意任何ViuTV的藝人，因為你可以有更好的選擇﹗」

最後，193代被傳遭無綫雪藏嘅吳業坤澄清：「坤哥絕對唔係俾人雪，大家如果有細心留意報道嘅話，坤哥遲啲係有機會去東京奧運會做採訪，佢兩樣工作唔可以同一時間接，因為會撞咗，拍劇好長時間，以我嘅理解坤哥係要接一樣工作，所以先接唔到另一樣工作。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！