「宅男女神」張曦雯脫貧成功 屋邨妹升呢住豪宅兼揸百萬名車

2012年華姐冠軍張曦雯（Kelly）擁有「ABC」外表兼火辣身材，一直於明珠台做主持，直至16年劇集《律政強人》出街後而人氣急升，成為唔少男士心目中嘅女神。喺呢一兩年，Kelly喺網上開台直播自己打機，打機時表情多多，有時仲會忍唔住爆粗，展現真性情，成功俘虜一眾男士。

喺上年，佢又憑劇集《跳躍生命線》中飾演「麻甩車房妹」文暉，成功入屋。雖然工作量唔算好多，但生活開始越來越富貴。上年中佢以個人名義買入120萬名貴四驅車，之後又搬去月租至少5萬多元嘅北角半山豪宅。

有傳媒爆料似足「竹昇妹」嘅張𣌀雯其實出身平平，兒時同父母住喺黃大仙下邨公屋。張父任職技工，張母做美容，直至佢小學四年班先移民美國芝加哥。報道仲話佢嫌原名（張詠欣）太普通，長大後先改名叫曦雯。

Kelly成為華姐冠軍後，加入無綫機會不斷，前路一片光明。無綫高層覺得佢觀眾緣好，近期被點名力捧，好似重頭劇《白色強人》同《解決師》中都飾演重要角色，一步一步走向「花旦」之路。