「安仔」周嘉洛鐵定暫別《愛·回家》 最想邊位演員「回家」?

·4 分鐘文章
周嘉洛
周嘉洛

無綫處境劇《愛·回家之開心速遞》播映以來都深受觀眾喜愛,無論收視定係口碑都好過唔少重頭劇,唔少藝員更憑劇中角色成功入屋,當中包括憑「金城安」一角彈起及獲得「最佳男配角」嘅周嘉洛。早前有傳佢獲無綫首席創意官王祖藍親自欽點,替代自己擔任古裝喜劇《痞子殿下》中嘅角色,消息傳出後唔少網民已經擔心周嘉洛會離開劇組。去到噚日,網上就流傳一張劇本照片,上面仲寫有「第1255集 再見安仔」,似乎周嘉洛真係要暫別《愛·回家》啦!周嘉洛喺接受傳媒訪問時就話第1255集仲拍攝緊,並話相信今次只係暫別而唔係永別,而新劇就預計5月初開工。雖然佢向觀眾派定心丸,不過網民們嘅反應都係非常大,紛紛留言嗌不捨。 其實過往都有唔少劇中演員相繼離開劇組,唔知以下邊位你最想佢回歸劇集呢?

博士(馬貫東飾)
喺劇集初期,博士一直暗戀熊若水,當時唔少觀眾都認為佢哋會喺埋一齊,點知突然殺出Mandy,最終佢哋有情人終成眷屬,仲越嚟越恩愛添呀!之後,Mandy被Jenny害,搞到要喺橙不忍島坐監,而博士更向坐監中嘅Mandy求婚成功。喺前年年初,博士決定放棄香港事業,去英國陪Mandy。

Mandy(謝芷倫飾)
Mandy係一個極拜金嘅港女,喺劇中不時奉承大小姐,仲與熊若水鬥嘴,不過佢都係一個又叻又醒目嘅秘書。之後佢暗戀博士,不停用扮拍拖呢個藉口去接近佢,幾經波折佢哋終於喺埋一齊。唔少觀眾都鍾意佢哋呢一pair,不過Mandy喺橙不忍島坐完監後,被安排唔返香港繼續做大小姐嘅秘書,而係選擇辭職去英國進修法律。

謝芷倫 & 馬貫東
謝芷倫 & 馬貫東

Jenny(陳偉琪飾)
「細龍太」Jenny係一個惡毒、巴辣又鍾意搞是搞非嘅人,佢經常喺辦公室出陰招,希望為自己及老公Max奪取更多權力。另一邊廂,佢又瞞住Max同情夫John發展婚外情。喺上年年中,劇情就講到佢幫爸爸雷公吞奪咗接龍集團,佢覺得自己出賣咗Max,所以冇面目見對方。之後,Max懷疑Jenny被雷公軟禁,搵廢柴同盟幫手一齊去營救Jenny。喺見到Jenny後,佢講出出賣真相及向Max道歉。之後雷公就話Jenny已經搭飛機走咗,短期內都唔會返香港。

陳偉琪
陳偉琪

傻強(馮奕森飾)
傻強係同安仔、朱凌凌同阿壯嘅大學同學兼好兄弟,雖然佢性格戇直,不過佢好錫自己嘅細佬妹,為咗佢哋不惜節衣縮食及不停賺外快。另外,傻強仲好鍾意識女仔,相信大家最深刻一定係鍾意過安仔媽咪熊尚善。喺前年年初,傻強被安排前往西伯利亞讀書,悄悄咁離開劇組。

馮奕森
馮奕森

Icy(岑杏賢飾)
大龍生嘅秘書Icy有樣有學識,仲係二太太佘秀琴嘅表妹。屬於二房派嘅佢,原本應該同大房派嘅KC敵對,不過佢哋連同Peter組成「外戚大聯盟」互相幫助。之後,Icy被有米男友狠飛,KC為佢做咗好多嘢,令佢對KC有好感,最後二人成功喺埋一齊。早前KC承認Icy要飛往美國照顧媽媽,半年後先會返回崗位,而秘書職位暫時由Rebecca頂替。

岑杏賢
岑杏賢

楊洋(劉思希飾)
「六美飯團」之一嘅楊洋,與財務部嘅俊華發展爺孫戀,不過早前佢就被安排到哈爾濱工作,未知幾時回歸劇組。

劉思希
劉思希

垃圾清(周梓盈飾)
謝芷倫離開劇組後,周梓盈飾演嘅垃圾清就成為大小姐(林淑敏飾)嘅新秘書。垃圾清係一個單純低調有錢女,平時做嘢懵懵地又唔夠醒目,絕對係「破壞王」之一,經常激到大小姐鬧爆佢。正當大家期待緊佢同Terry(李偉健飾)有冇機會可以成為CP嘅時候,周梓盈便離開劇組。

周梓盈
周梓盈

欣欣(邵珮詩飾)
欣欣係劇集初期尋寶圖嘅職員,係一個傻頭傻腦嘅斯文乖乖女,經常吞聲忍氣而被人恰,因此佢決定辭職,要闖一番事業。

邵珮詩
邵珮詩

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!