「成龍魔咒」仲有品牌未死 進駐快手未必睇淡

·4 分鐘文章
拆解成龍任代言必出事疑團的「成龍魔咒」,多涉及實體產品和服務
拆解成龍任代言必出事疑團的「成龍魔咒」,多涉及實體產品和服務

快手公布成龍開賬號兼出任「溫暖大使」,唔少人即時反應係指成龍過去擔任嘅企業代言後來都「有事發生」。不過人要向前看,成龍與快手雙強聯手,其實大有可為。

先拆解成龍任代言必出事疑團的「成龍魔咒」,過往多涉及實體產品和服務,代言「視頻」前所未有,「小霸王」等舊經驗能否套用在新科技上頓成疑問。

下載Yahoo財經App

美股、外匯、加密貨幣免費即時報價,自選投資組合獲取相關新聞提示

有段長時間搵成龍任代言嘅Canon,依然未消失
有段長時間搵成龍任代言嘅Canon,依然未消失

Canon「未死」

再者睇往績唔少品牌出事距離成龍拍廣告都有一段日子,市場認為成龍可以令企業慢性毒發「身亡」,但隔好多年才倒閉就咁入成龍數似乎未必講得通,代言過一段時間倒閉亦講唔通,更何況暫時仲有個品牌「未死」,就係有段長時間搵成龍任代言嘅Canon,雖然近年相機銷售額下滑,但講「出事」對手Nikon就更加大鑊,況且睇Canon最新業績,又唔似中「鐵沙掌」有內傷。

Canon最新Q3業績大升
Canon最新Q3業績大升

快手有意逐步開拓海外新興市場

翻查成龍過去品牌,本地市場產品「中咒」居多,「打國際線」似乎比較順利,然而快手所處行業並無太明顯疆界,搵成龍合作至少可開拓兩大藍海,其一正一是新興市場,原來快手旗下快手國際早前在巴西推出品牌化廣告平台Kwai for Business,提供內容及廣告一站式解決方案,照咁睇快手有意逐步開拓海外新興市場,呢方面成龍就一定幫到手,皆因本地功夫巨星在新興市場仍有相當號召力,羅莽師傅都曾透露自己在非洲及美國中部原來有大班粉絲。

民間傳說「成龍魔咒」之一,是香港航空
民間傳說「成龍魔咒」之一,是香港航空

蝦皮購物剛搵成龍拍廣告

當大家關注「成龍魔咒」之際,成龍又的確仲有Job接,由新加坡華人創辦的蝦皮購物(Shopee)剛剛就搵咗成龍宣傳 9.9 超級購物日,宣傳片在馬拉、越南、巴西等地方都會睇到,據說「成龍永恆」皆因其打功夫形象深刻,而且經常笑臉迎人,所以適合跨國網購宣傳。如今快手與成龍開展合作關係,在新興市場打品牌戰就更具優勢。

功夫短劇串流有威力

二是搶攻短劇藍海,據快手大數據研究院發布半年報,單係今年三月份,就有逾三億用戶在快手煲短劇。講求節奏爽快、打得過癮的功夫片,正是拍短劇的上佳類型,由成龍牽頭炮製功夫短劇系列,每集以一式絕招作引子,並在片尾由成龍親自教授,相信這系列在內地及海外均有市場。另外Netflix介紹經典電影幕後製作的《電影的故事》近期大熱,成龍手上有大堆經典動作電影,由他搞短劇講當年拍攝趣事,再示範經典動作招式竅門,同樣有力搶攻短劇藍海,睇1984年的《龍威小子》續篇拍成《Cobra Kai》,都可以翻叮男女主角上節目,可見成龍在串流世界的威力還有潛力發揮。

「成龍問號」深入民心
「成龍問號」深入民心

「成龍問號」深入民心

最後補充一點新興市場如巴西真係唔少成龍迷,「成龍問號」meme圖深入民心,事實上現時有巴西足球員都改咗個名叫Jackie Chan,話說係教練見佢個look似,一時興起幫佢改名云云。

憑上述幾點,加上快手資本實力,似乎今次成龍任代言都不能率先武斷地睇淡吧,只是那些廣告故事,未必可以再在香港發生。在香港,是得MIRROR得天下?

相關報道:

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能