「股壇金手指」化身「樓市金手指」?

Aerial view of Taikoo Shing, an high rise housing complex built in Quarry Bay on Hong Kong island. Hong Kong.

香港樓市進入關鍵時刻,有名人沽貨,亦有名人大手掃貨,尤其掃入豪宅新盤,有「股壇金手指」之稱謝清海連吸兩個豪宅單位,究竟有無參考性?

下載Yahoo財經APP
美股、外匯、加密貨幣免費即時報價,自選投資組合獲取相關新聞提示。

惠理集團聯席主席兼聯席首席投資總監謝清海於短短一個月內連花近5000萬元大舉入市,連購兩豪宅。首先,係上月初以2711萬元購入黃竹坑港鐡站「晉環」921方呎的三房單位,呎價29436元。

之後同月底再斥2280萬元,購入太古城中層海景單位,單位實用面積1,015方呎,戶型係3房1套,呎價22,463元。

跟大戶身影 認真你就輸

明顯佢對港島樓情有獨鍾,更睇好港鐡沿線物業,一個老牌屋苑樓齡超過40年,一個豪宅樓花,新舊通殺。

投資樓市同股市都係講眼光,講到眼光,無人夠佢玩,佢打理基理基金好巴閉,專攻潛力長升股的惠理價值基金成立至今,回報有成2366%,「金手指」非浪得虛名。

不過,近期惠理表現有放慢跡象,截至4月底管理資產總值跌至132億美元,今年1月底為148億美元,唔見16億美金。惠理價值基金今年至今表現麻麻,升8%,只輕微跑贏恒指表現升7.1%。

疫情下全球金融市場大亂,基金佬要係股市大啖食,談何容易,只要唔蝕錢已偷笑。有時,問股壇大佬點睇後市,認真你就輸。事關基金經理向外講一套,不一定就係私下操盤個套。

謝清海於1月中曾向本港傳媒大派股市定心丸,當時入市仍有大賺機會。睇番恒指走勢,言論出現時恒指處28800多點,多得北水掃貨,於2月中創下逾3.1萬高位,不過其後內地收水、反壟斷調查及美債息率急升,港股由高位拾級而下。如果你跟佢入市,好彩嘅而家就原地踏步,唔好彩又揸蟹貨。

富豪財富多盤算更多

富豪身家多,最關心資產多元化,磚頭是投資組合中必需品,所以名人大手掃樓為收租、為保值、為抗通脹,比一般平民盤算更多。佢買唔代表你要買,買同沽參考性唔大。