「試當真」新片疑似影射TVB《開心大綜藝》 游學修扮Bob獲真身公開大讚

本地YouTube頻道「試當真」喺嚿年10月開台，一系列貼地同搞笑題材成功爆紅，日前就搵嚟林雪同林明禎做嘉賓，拍攝《「藍妹啤酒」特約：開心大關注》影片，並由游學修、許賢（腎仔）、蘇致豪（豪哥）同倪安慈（阿慈）做主持，獲網民一致大讚。

影片除咗將TVB節目《開心大綜藝》同《大整蠱》部份內容重新演繹，其中加設「蒙著眼估藍妹」遊戲環節仲拎埋姜濤嘅歌嚟玩，就連現場觀眾戴嘅口罩都同TVB一模一樣，唔少網民都留言指「試當真」將TVB陣尷尬味充份表達晒出嚟：「好中意你地扮番TVB d尷尬野」、「尷尬味真係原汁原味」、「真係佩服你哋拍嗰時點頂」等等，就連TVB藝人蔡嘉欣都留言指：「藍妹可唔可以買多個廣告，贊助一噸啤酒俾試當真贏返屋企」。

四位主持亦喺影片中分別扮演「7永」、「A君」、「阿Pop」和「早難」，疑似影射TVB節目主持阿Bob（林盛斌）、C君、陸永及王祖藍，雖然只係戴頭套同眼鏡扮演，但四人一句「打和啦」以及影片一開始句「嘩」，令網民激讚演繹得夠傳神，入型入格，就連阿Bob都喺Facebook分享游學修扮演「阿Pop」嘅相，表示：「好似，好正！繼續拍多啲好笑同過癮嘅片，將多啲歡樂帶俾每一個觀眾。努力，加油。」有網民就認為阿Bob呢個舉動好大方，同時有人模仿係因為有市場價值咁話。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！