【旺成咁！】ViuTV吉祥物Sound Bear毛公仔火速換罄被炒至過千元

ViuTV五歲台慶舉辦「ViuTV 5周年電視賞」，送出總值超過300萬嘅獎品。觀眾儲齊指定數目印花就可以換取Sound Bear限量版精品、MIRROR及ERROR簽名禮品、家庭電器及購物禮劵等豐富獎品。活動已經開始咗超過一星期，觀眾反應非常熱烈，唔少獎品已經火速換罄，相當誇張。噚日先換罄嘅Sound Bear毛公仔仲已經喺買賣平台出現，有人竟開價$1000放售。

咁換Sound Bear毛公仔要幾多個印花，觀眾儲齊60個印花就可以換領，不過毛公仔名額只要470個，所以去到噚晚已經換罄。雖然有唔少網民換唔到毛公仔，不過就有成功換領嘅網民將毛公仔放售，更竟然開價$1000。除咗毛公仔之外，Sound Bear口罩同樣被放上買賣平台出售，開價$50至$150。換唔到嘅網民紛紛留言，集氣希望ViuTV可以將獎品加碼。

另外，大台吉祥物TVBuddy都有人放上買賣平台出售，而毛公仔價錢介乎一套4隻$220至每隻$180不等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！