「Package Lau」劉鳴煒貼地做跟班湊仔 樂園陪玩全程冇工人保鑣

38歲、人稱「投胎界KOL」的Package Lau劉鳴煒去年8月在一節目中自爆10歲生日收父親劉鑾雄10萬現金，頭6個月沒有用過，更隔日數銀紙，而他亦表示不會對自己子女這樣做：「我覺得你獎賞他，那太多了。如果想做教材，你想灌輸理財知識，我相信有更好的方法，不是給一筆錢看他怎樣做，不應該像做實驗。」劉鳴煒絕少提及他的子女，當年他與前妻Karen所生的一對龍鳳胎亦選擇在公家的瑪麗醫院出世。

劉鳴煒對子女的生活甚低調，從未帶他們出席公開場合，《蘋果》讀者陳小姐日前透過「爆相爆片」直擊他帶着一對10歲大的龍鳳胎去他做副主席的海洋公園家庭日，當日早上約10點05分，即海洋公園只開了5分鐘，陳小姐就遇到劉鳴煒及一對龍鳳子女在海洋列車站出現，他們沒有保鑣或工人姐姐陪同。身穿短袖格仔恤衫及短褲打扮的劉鳴煒單膊揹住一個背囊，手拎住子女的白色外套，陳小姐表示：「由於樂園係啱啱開，所以好多遊戲都唔係好使排隊，佢哋喺列車上，全程用英文交談，劉鳴煒偶爾篤吓手機，兩個仔女到站後，就飛奔去玩『冰極天地』，劉鳴煒搭扶手電梯想搵番佢哋時，就被一個大陸人阻住去路，佢有禮貌地同對方講『Excuse me』，就即刻搵搵對仔女，見到佢冇入到去同仔女一齊玩，只係喺出面等候。」

一對仔女玩完遊戲，劉鳴煒就接他們去下一站，片中見他一對仔女走路時相當興奮，其中女兒更揈住雙臂急步行，陳小姐再補充：「我哋撞番佢時，都已經係一個鐘頭後，佢哋就想玩嗰個遊戲叫『翻天覆地』，似係有啲高難度刺激，佢哋研究咗一輪，最後都決定去玩，不過劉鳴煒同之前一樣，都係陪佢哋去，但自己唔玩，係出口等番佢哋。見佢全程都冇保鑣同工人，抵讚。」