【元祖爆肌男】淡出幕前管賭廳 周文健憶述出道啤酒廣告15分鐘拍完 未傾價錢就收工
而家男藝人除衫晒肌同女藝人水著現身一樣,係賺取知名度嘅基本盤。當年娛圈冇咁多爆肌男,高大有身型嘅周文健就喺九十年代跑出,七八十後一定記得佢拍過嘅TVB劇《他來自天堂》,同埋一系列啤酒廣告。
今年61歲嘅周文健(Michael)喺九十年代娛圈非常活躍,喺日本漫畫《城市獵人》非正式香港版本電影《孟波》擔任男主角,而且片約唔少,證明一身肌肉有著數。後來香港電影市道麻麻,Michael遠赴荷李活同北京發展,2006年因緣際會認識向華強夫婦,因此有機會轉行去打理賭廳,一做十年,跟住自己搞飲食生意,但係競爭太大要結束。3年前導演翁子光搵Michael拍電影《風再起時》,拍完又再同佢合作林海峰、蘇玉華主演新片《正義迴廊》。
Michael於YAHOO TV《娛樂訪談》上坦言放棄咗娛樂圈,冇諗過會再拍戲,自己鍾意電影但唔係「冇戲做會周身痕」,屬於冇戲癮嘅演員。《風再起時》講述六十年代四大探長事跡,Michael係其中一個,另外三位係……梁朝偉!郭富城!譚耀文!復出就要對住2個影帝,外國長大嘅Michael一於好少理,因為之前已經同梁郭二人合作過,拍《風再起時》覺得似度假多啲,亦唔打算重返娛圈。
令周文健為香港人認識嘅,可能係80年代後期一系列啤酒廣告。Michael憶述當年喺加拿大返香港之後,搵到份工喺健身室做教練,原來呢個場係廣告導演集中地。Michael憑住高大魁梧身型,備受去Gym嘅幕後人歡迎,搵佢拍過好幾個廣告。呢個啤酒廣告本來搵咗另一位爆肌男演出,點知佢身型縮水,導演唔收貨,後來搵Michael試鏡。點知當晚就收到電話叫佢聽朝開工!
去到現場,Micheal仲早到過攝製隊,隔一陣終於有人幫佢整頭換衫。成個廣告Michael就係飲住啤酒聽住歌扮chill,因為飲嘅係真啤酒,所以越飲越high,結果15分鐘就拍完。最重要係,到收工都未有人同Michael傾有幾多演出費!
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!