【兩父子都離婚】為「好新抱」張栢芝平反 謝賢：真係未見過王菲

「由細到大都精采，好滿足自己呢一生，我書又讀得少，屋企又照顧得好，兄弟姐妹又好尊重我，朋友更加愛我，仔女孝順到不得了，有時間就打畀我陪食飯，我個仔就幾加好啦，依家養我咁滯！我做人，話我唔識做又好，乜都好，總之我冇乜所謂，唔好對我唔住就得，未試過有人對我唔住，我亦都冇對人唔住，一生人無愧於心。」謝賢說。

兒子謝霆鋒跟四哥一樣，都是16歲未讀完書就入行，四哥說：「大學畢業唔係一定出人頭地，佢依家做得咁好，我真係好開心好滿足，我都諗唔到我個仔依家咁好，所以我對佢冇乜要求。」說到現在的霆鋒紅過爸爸，謝賢感到很驕傲：「冇錯，呢個應該，如果佢唔紅得過我，我就兜巴星佢，哈哈哈！」四哥坦言跟霆鋒沒代溝：「我同仔女都冇代溝，真係好開心，佢後生好反叛，自從入咗行之後，個人變晒，佢讀書都好少，但入行之後更加識做人，我今日睇電視見到佢，衰仔，做得幾好喎！舊時佢幾靚仔，依家我唔敢批評，哈哈！」

不過，兩父子都經歷婚姻失敗，四哥嘆氣：「唉！呢啲天意囉，我哋都唔想失敗，婚姻呢兩個字真係要改，我諗唔出要畀乜名詞佢，但好似我哋咁嘅人，就算婚姻失敗，但我哋唔會hurt對方，呢樣我同我個仔講，好多人都失敗，有啲失敗你斬我一刀，我斬你一刀，我哋唔係，就算分開都好關心佢哋，有乜嘢事可以滿足佢哋。」

然而，四哥跟拉姑簽紙離婚時相擁道別，兩人再見亦是朋友，相反，當年霆鋒和前妻張栢芝鬧離婚，栢芝卻公開數臭霆鋒，而霆鋒亦發聲明指跟栢芝「不知如何走下去」！對於自己比霆鋒處理得更好，四哥坦言：「時勢唔同啫，佢哋關係點樣呢，仲比我大，呢樣冇得講！」問到會否想霆鋒再結婚？四哥笑說：「關我鬼事咩，我從來做老竇，唔會做呢啲權力去講嘢，如果佢有鍾意嘅人咪一齊，唔鍾意咪拜拜，呢個唔啱咪換第二個。」

記者指霆鋒好鍾意王菲，兩人世紀復合，四哥說：「呢樣唔好問我，我恭喜佢就得嘞，哈哈哈！」問到霆鋒有冇帶阿菲見你？四哥說：「真係未見過，從來未見過，因為佢嘅私事，都唔想經過老竇，唔通我去搵個女朋友，又問佢正唔正喎，shot shot哋，唔係自由度，唔可以超越嘅範圍，老竇同仔係平等。」

談到Lucas和Quintus兩個寶貝孫仔，四哥笑容滿面說：「孫梗係錫，證明我嘅家可以一路傳落去。」記者讚大孫好靚仔，四哥說：「細孫大咗都ok，個新抱都好，好孝順，嗰陣佢哋未分開，我哋成日一齊食飯，總之栢芝係我一個好錫嘅人，佢對兩個細路仔幾好，好難㗎，佢教得好好，有時我睇到佢，我都有啲眼淚。」對於傳聞栢芝好少讓兩老見孫仔，四哥代平反：「有時兩個禮拜，有時一個禮拜見下，佢唔會唔畀兩個仔去霆鋒度，我都係去霆鋒度睇佢哋，孫喺佢張床度，三個人攬住傾下偈，我等佢玩完出嚟，到我嘞，總之兩個孫去霆鋒度，司機就會同我講。」

撰文：余燕儀
攝影：仇志德
攝錄：廖達燊
場地：Table 18@apm