【冇同莫少聰聯絡】18歲囝囝鎬濂出道做范丞丞師弟 洪欣:當然支持佢

(微博圖片)
(微博圖片)

48歲嘅洪欣同前父莫少聰所生嘅囝囝莫鎬廉(張浩鋒)話咁快已經18歲大,媽媽洪欣喺09年同細佢10年嘅大陸演員張丹峰結婚後開始淡出娛樂圈,不過唔知係唔係因為自幼薰陶嘅關係,有消息指18歲嘅鎬廉打算出道加入呢個養大佢嘅娛樂圈。

據大陸傳媒報道,改名做張鎬濂(Ashley)嘅洪欣囝囝已經同樂華娛樂簽咗合約,做范丞丞師弟,而呢條消息喺微博上亦得到洪欣「讚好」,至於Ashley嘅微博暫時未見任何內容,但已經有心急嘅fans為佢成立後援會,而其他食花生嘅網民除咗話Ashley同媽媽似到十足之外,仲話佢似台灣組合S.H.E.嘅Ella。

洪欣最近接受大陸訪問時,話過覺得自己最虧欠嘅就係個仔,為咗生計喺囝囝只得一歲大時洪欣就要離開佢一個月去北京拍戲,當佢難得請假返去探個仔時,未識講嘢嘅囝囝見到洪欣,即刻坐起身拎口中嘅奶嘴掉向媽媽,之後就開始大喊,洪欣講返呢段回憶都不禁落淚。

對於個仔入行,洪欣今日接受《蘋果》訪問時被問到有冇意見畀個仔,佢話:「都冇乜建議呀,當然我都支持佢啦。」洪欣話自己呢排箍牙帶住牙套,所以講嘢唔多清楚,佢又話:「當然支持佢啦,唔支持佢佢都唔會入呢行。其實最支持佢都係我老公(張丹峰),佢同我老公商量過。其實由細到大我都畀佢好大自由,當然希望佢可以唔入梗係最好啦,大家都知道呢行壓力幾大啦,但如果佢真係鍾意嘅話,我都會支持佢嘅。」

個仔係咪好鍾意韓風?洪欣話:「其實佢一直好鍾意唱歌跳舞,咁啱有公司招佢去訓練。」會唔會個仔初期已經覺得好辛苦?洪欣話:「其實佢又唔怕辛苦,佢幾挨得,一啲都冇覺得辛苦,因為佢自己鍾意。」點解兩公婆唔做埋個仔經理人?洪欣話:「我哋一向唔係做開經理人,唔會啦,最多佢唔識就問我同問爸爸畀啲意見佢。」

莫少聰知唔知個仔入行?洪欣話:「我唔知喎,我哋一向冇聯絡。」個仔有冇問莫少聰意見?洪欣話:「我諗你唔好講佢,我哋又冇聯絡,又點問佢意見呢。」

洪欣喺09年同細佢10年嘅大陸演員張丹峰結婚,仲生咗個女(微博圖片)
洪欣喺09年同細佢10年嘅大陸演員張丹峰結婚,仲生咗個女(微博圖片)
洪欣同仔女感情要好(微博圖片)
洪欣同仔女感情要好(微博圖片)
有消息指鎬濂打算出道(微博圖片)
有消息指鎬濂打算出道(微博圖片)
有網民話鎬濂同媽媽成個餅印咁(微博圖片)
有網民話鎬濂同媽媽成個餅印咁(微博圖片)