【冇諗過同的士邦發展】自爆有圈外追求者 唐詩詠：女人要努力搵錢先

陳豪、唐詩詠、王浩信、姜麗文噚晚喺鑽石山出席倒數活動，唐詩詠近日傳撻著姚子羚舊愛鄭子邦(的士邦)，一齊去禪修做善事，唐詩詠話：「以為自己單身可以好正，點知所有男性動物都被形容為我伴侶，覺得唔好意思，呢個團隊三十幾位義工，全部都認識，亦唔係第一次一齊去做義工。我唔想影響人哋，今次傳呢個，下次傳第二個，我都用咗好多時間去學習，依家學識咗都想教人。」

當日被捕捉畫面，顯見兩人關係都幾好，有冇發展可能？詩詠就話：「話我哋幾好就係最奇怪地方，我哋大家都係做義工，唔可以話人唔好，話好就會有無限聯想，將來未發生事唔去評論，我哋只係上堂，發展呢啲唔會去諗。」詩詠又透露現時有一位追求者係圈外人，但就好秘密話：「唔講，講咗會冇。」新一年願望係咪希望可以搵到合適伴侶？佢話：「梗係工作先啦，嚟緊會拍動作戲，挑戰難度，女人要努力搵錢先，愛情有就有，冇都有錢，所以有冇愛情都要努力搵錢先。」

今年屢傳婚變王浩信雖然多次否認，噚晚佢話倒數前喺屋企食完飯先出來工作，仲話：「太太唔使開工，我出嚟搵食，新一年希望工作有新嘗試，除咗演技亦會努力做音樂，夢想係踏上一次紅館，以前感覺好渺茫，但o依家朝呢個方向，希望獲得唱片公司賞識。」來年願望會唔會想少啲傳婚變？王浩信話：「要回應嘅都回應咗，希望樣樣都正面啲。」一家三口多啲出嚟闢謠？佢就話：「我會維持番自己作風。」

陳豪啱啱一家五口喺澳洲度過一個熱辣辣嘅聖誕節，佢話：「小朋友同屋企人都好開心，假期就希望越多越好，但係要返嚟做倒數，每年除夕都要出嚟搵錢，太太都好明白，所以比較少同小朋友一齊倒數。」陳豪和太太陳茵媺將一家人相片製作日曆，放閃好sweet，陳豪話：「呢個日曆都整咗好耐，全程由太太發版，盡量每年都希望可以有一個trip去做呢樣嘢，平時啲人就會將相片儲喺雲端，電子化聽落好方便，但未必會睇返，啲相如果有一個實質物件喺度，就會係一個好好回憶。」新一年願望會唔會想生多個小朋友？ 陳豪就笑笑口話：「生唔係問題，教同養會幾繁忙，依家小朋友長大入學，我哋都好鍾意小朋友，搞掂呢三個為主先，希望新年身體健康，唔好有太大衝擊就好。」