【冇霆鋒份】張栢芝撐舊愛開金口 「東芝戀」分手18年台上復合

38歲嘅張栢芝本來已是兩子之母，同前夫謝霆鋒育有11歲大仔謝振軒（Lucas）同8歲細仔謝振南（Quintus），至去年11月《蘋果》踢爆佢再誕第三胎，栢芝亦喺上月17日兒子滿月當天，主動喺社交網宣佈再為人母喜訊，但就未有透露第三個兒子嘅生父是誰。

隨着栢芝公開再誕B，最近佢亦再度活躍社交網，間唔中都會影相、拍片放上微博，又話要同網友分享生B後嘅收身經驗。工作方面，栢芝除咗為周星馳新片《新喜劇之王》配音，曾經都係歌手嘅佢，據知，佢嚟緊仲會再踏舞台，同舊愛合體演出添！

今年3月17日，霆鋒將會喺亞洲國際博覽館露天廣場開騷，不過，今次同栢芝合作嘅舊愛，並唔係前夫謝霆鋒，而係3月9日喺紅館開騷嘅陳曉東。

栢芝同東東於00年譜「東芝戀」，雖然兩人僅拍拖1年就分手，但相戀時愛得轟烈，分手後亦做到再見亦是朋友，幾年前東東第一次做老竇，栢芝亦有致電恭喜佢。

其實，之前東東曾經被傳媒問過，今次演唱會嘅嘉賓名單，但東東一直守口如瓶，後來被問會唔會請栢芝睇騷？東東答嘅時候都窒咗一窒，然後就話呢個提議都唔錯，但其實東東早已經攞咗太太嘅「批文」，亦已經聯絡咗栢芝，請咗佢嚟演唱會任嘉賓。