【千禧五虎】回顧TVB造星方程式 元祖五虎將出雙影帝 五美圖、銀河十星有邊個?

·5 分鐘文章
【千禧五虎】第一代TVB五虎將出雙影帝 新五虎、銀河十星有邊個?
【千禧五虎】第一代TVB五虎將出雙影帝 新五虎、銀河十星有邊個?

最近有傳TVB將會力捧余德丞、羅天宇、朱敏瀚、周嘉洛及丁子朗5位年青男藝人,更被喻為「千禧五虎」。橋唔怕舊最緊要受,向來TVB都會用個名目捧一批新人上位,但又係咪真係鋪鋪中?

五虎將

【千禧五虎】第一代TVB五虎將出雙影帝 新五虎、銀河十星有邊個?
【千禧五虎】第一代TVB五虎將出雙影帝 新五虎、銀河十星有邊個?

TVB「團體式」造星始祖,包括梁朝偉、劉德華、黃日華、湯鎮業同埋苗僑偉。為咗捧起5位小生,大台直情開套《五虎將》俾佢地做主角。當時反應好好,五個話咁快就上位做,後來梁朝偉同劉德華轉投影圈成績斐然,合共拎過8次香港電影金像獎影帝。黃日華留守電視圈,拍過多套高收視劇集,演《射鵰英雄傳》郭靖一角更紅遍華人地區。外型最好嘅湯鎮業轉到內地營商兼拍劇;而苗僑偉就喺90年代全身投入眼鏡生意,後來以過億元賣盤,近年再返TVB拍劇過戲癮。

銀河十星

【千禧五虎】第一代TVB五虎將出雙影帝 新五虎、銀河十星有邊個?
【千禧五虎】第一代TVB五虎將出雙影帝 新五虎、銀河十星有邊個?

眼見五虎將成功,TVB於是再接再厲,喺1988年推出「銀河十星」,被力捧嘅五男五女分別係胡越山、邵仲衡、郭富城、李中寧及李耀敬,加上李婉華、邱淑貞、吳詠紅、林穎嫻及崔嘉寶。比起「五虎」,「銀河十星」成效唔算太好,係人都知最紅嘅係郭富城,但係城城跑出都係因為去台灣拍咗個電單車廣告而爆紅,同TVB冇太大關係。另一位演藝成就突出嘅係邱淑貞,不過「豆豆」喺TVB只有2年,拍過3套劇咁大把,成為王晶御用女主角先至係成功關鍵。

真係被捧得起嘅應該係李婉華,做過多套劇集女主角,最經典嘅梗係《卡拉屋企》。邵仲衡拍完《大時代》之後冇耐轉行做室內設計,同劇嘅吳詠紅亦都轉行做化妝品牌培訓導師。港姐出身嘅林穎嫻同崔嘉寶分別嫁人息影;李耀敬喺TVB冇咩發展之後轉攻內地;外表戇直嘅李中寧原來係葉童同父異母阿哥,離巢後拍過三級片,之後移民英國,早幾年有傳媒搵到佢做緊保安。

95.新五虎

【千禧五虎】第一代TVB五虎將出雙影帝 新五虎、銀河十星有邊個?
【千禧五虎】第一代TVB五虎將出雙影帝 新五虎、銀河十星有邊個?

「銀河十星」未竟全功,1995年TVB再搵5個小生古天樂、劉愷威、吳家樂、古巨基、何遠恆上馬做「95.五虎將」。古天樂可以話係繼承梁朝偉同劉德華嘅成功方程式,喺大台上位之後轉到電影圈發展,近年做埋老闆,連藝術中心個影院都以佢命名。古巨基主攻樂壇,《歡樂今宵》一碟賣過20萬張,後來簽黃柏高再創高峰。劉愷威離巢北上發展之後成為一線藝人,同楊冪嘅一段婚姻更係一時佳話。吳家樂依然喺TVB效力,外貌冇咩改變,而家有三個仔女,外父係其士集團主席周亦卿。而高大嘅何遠恆最為人記得係做過《城市追擊》主持,演藝事業發展平平,後來做冷氣工程及瓷磚生意,曾經同過李彩華拍拖3年。值得一提係,呢組五虎似乎仲有交情,早幾年古巨基開演唱會仲會齊人上台做嘉賓。

95.五美圖

【千禧五虎】第一代TVB五虎將出雙影帝 新五虎、銀河十星有邊個?
【千禧五虎】第一代TVB五虎將出雙影帝 新五虎、銀河十星有邊個?

1995年唔止有五虎,仲有五美圖!捧嘅係五朵小花,分別有傅明憲、曹眾、彭子晴、姚瑩瑩、陳彥行。可能呢條方程式唔適合捧女藝人,五個都唔算發展突出。姚瑩瑩到而家仲喺TVB,由少女演到變媽咪級,同樣喺TVB做咗13年嘅曹眾而家打理緊飲食生意。唯一一個做過女主角嘅傅明憲1999年離巢嫁俾商人葉劍波,2008年離婚。喺《真情》戲份唔少嘅彭子晴曾經過檔亞視,後來淡出娛圈做保險;而身材出眾嘅「行姐」陳彥行嘅代表作可能係《皆大歡喜》嘅金日,同埋係咁上《獎門人》做嘉賓,近年同梁思浩主持網台節目,舊年思浩轉做收費節目,行姐以屋企有私人問題為由辭任。

奧運六星

【千禧五虎】第一代TVB五虎將出雙影帝 新五虎、銀河十星有邊個?
【千禧五虎】第一代TVB五虎將出雙影帝 新五虎、銀河十星有邊個?

「新五虎」後差唔多10年,係時候捧新人,2004年正值雅典奧運,TVB搵林峯、馬國明、黃宗澤、吳卓羲、陳鍵鋒、黎諾懿做宣傳大使,外界認為佢地都會備受力捧,而佢地的確有機會擔正。不過奇就奇在咁多個當中,只有馬明能夠成為視帝。最早離巢嘅陳鍵鋒一早北上掘金,差唔多套套劇都係男一;歌影視三棲嘅林峯係「六星」之中最全面,2014年出走TVB,上年回巢以部頭形式拍《使徒行者3》;黃宗澤同吳卓羲都係類似情況,約滿就返內地搵真銀。同馬明一樣仲留喺TVB嘅黎諾懿,因為《愛回家》馬壯一角再次彈起,近年做埋爸爸,幕前演出都轉埋型做烹飪主持。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!