【只想專注做好牛腩】金融經紀轉行灣仔開濃湯牛腩麵店 招牌牛骨濃湯崩沙腩河

飲食業出名辛苦，係咩驅使你毅然放棄高薪厚職走去開餐廳？只係因為有一顆跳出Comfort Zone嘅心。「我本身份工人工高福利好又夠輕鬆，但我覺得如果而家我唔做，再老啲就無咁嘅魄力。」灣仔呢間濃湯牛腩麵店，老闆Tommy本身從事外匯金融經紀工作，因為希望退休前畀自己一個挑戰，所以就襯疫情期間租金下降，開設呢間主打濃湯牛腩嘅小店，用最好嘅食材，一心專注做好牛腩。

Tommy零飲食業經驗，但自己本身就好鍾意食牛腩，喺屋企成日都整，唔少朋友食過都話好，大讚比坊間知名牛腩店更好食，所以佢對自己出品都好有信心。

招牌陳大哥崩沙腩河（$98）

店內所有牛腩都向牛腩名店牛皇莫拎貨，皆因Tommy食過咁多牛腩，都係覺得佢哋嘅牛腩最出色，「佢哋嘅牛腩味道好獨特，帶有一種甘香。」牛腩用牛骨湯炆煮，一定要注意火喉，唔可以炆得太腍或太韌。講到識食當然要食崩沙腩，呢個部位肥少少，牛脂味香濃，分得再仔細啲，Tommy推薦大家食爽腩位置，「呢個位置只有只有一層膜，特別有咬口，而且最稀有，有時見到啲客人唔識以為係肥膏就唔食會好心痛。」如果唔想食脂肪多嘅部位，可以改食牛坑腩（$78），牛味會重啲。

湯底方面，同坊間一般見到嘅清湯腩好唔同。老闆自家研發咗牛骨濃湯，用大量牛骨及雞殼等食材熬製而成，牛味突出。

特色牛腩濃湯拉麵（$60）

呢個牛腩濃湯拉麵老闆係從日本濃湯拉麵取得靈感，平時都係聽豬骨濃湯拉麵多，牛骨濃湯坊間真係較少見，湯底充滿膠質，配上牛腩、牛筋、木耳絲、溏心蛋等食材，味道頗有驚喜。

咖喱牛腩（$68）、咖喱三寶（$45）

咖喱係餐廳另一招牌，一開始做嘅時候味道偏向港式，Tommy有一位大廚朋友就覺得未夠驚喜，所以私下傳授咗呢款帶有東南亞風味嘅咖喱畀佢，咖喱微辣重椰香，亦有陣陣香料味。

地址: 灣仔軒尼詩道288號英皇集團中心地下G13號舖