【召集芫荽控】一路向荽！嚴選全港10間荽餐料理

芫荽呢家嘢，好極端，鍾意嘅就好鍾意，唔鍾意嘅就即刻西晒面。但因應住芫荽黨嘅壯大，愈嚟愈多餐廳都推出各式各樣嘅芫荽料理，由主菜到甜品都有，招呼一眾荽客。不論你入咗芫荽黨未，自問係荽客嘅你，以下呢十間荽舖，你哋試過晒未先？

芫荽雪糕 Sogno Gelato

綠色唔一定係抹茶雪糕嘅，仲可以係芫荽雪糕！！！呢間本工意式雪糕店一向創意多多，有多款唔同創新口味嘅Gelato，呢期仲有最hit嘅芫荽味添~ 啖啖清香，可惜佢哋2月底就結業喇，芫荽黨想試記得趁早～

荽指數：🌿

芫荽士多啤梨瑞士卷 1987Kitchen

估你唔到連甜品都可以加芫荽？！呢間喺元朗嘅西餐廳研製咗芫荽士多啤梨瑞士卷，卷蛋荽味唔太重，同忌廉嘅比例啱啱好，幾平衡。除咗甜品，佢哋仲有獨門秘製嘅芫荽醬，無論放落意粉定用嚟點牛扒都一樣夾。

荽指數：🌿🌿

芫荽醬油 悅和醬園

芫荽嘅風潮真係勢不可擋，就連喺1945年成立嘅傳統醬園──悅和醬園都推出咗芫荽醬油，買支返屋企咩餸都點下，就樣樣都有荽味咯~ 不過有試過嘅荽友表示荽味略為淡咗少少。btw，想買嘅要去門市啊，聽聞每次批貨量唔多～

荽指數：🌿🌿

芫荽燒賣＋夠茜豉油 叁拾士多

呢間新潮嘅士多主售急凍食品，佢哋嘅芫荽魚肉燒賣日日都好多人買。芫荽魚肉燒賣用門鱔魚肉打成，加埋芫荽葉，蒸完後魚肉香中滲透住陣陣荽香～另外，佢哋仲有芫荽豉油，用嚟點芫荽燒賣絕對可以荽上加荽！平時用嚟點腸粉、撈麵、撈烏冬、蒸魚、打邊爐等等同樣夠荽！

荽指數：🌿🌿

芫荽燒賣 老虎岩

呢間茶餐廳都有芫荽燒賣，佢哋對芫荽同肉嘅比例好講夠，而且燒賣係新鮮手打，口感豐富，同一般用機做嘅好唔同。除咗堂食即場拮幾串，仲有急凍嘅芫荽燒賣，拎返屋企隨時慢慢嘆都得～

荽指數：🌿🌿🌿

芫荽炒蛋三文治 大吃大喝

呢間喺油麻地地鐵站附近嘅小食店，都搵到芫荽嘅蹤影。對芫荽黨嚟講，一份好食嘅三文治，配料唔使多，最緊要芫荽夠多！呢度完全做到，厚切芫荽炒蛋三文治，方包軟熟，芫荽炒蛋份量十足。廿幾蚊仲包埋飲品，買嚟做早餐，一個good morning就由荽開始。

荽指數：🌿🌿🌿

芫荽車仔麵+芫荽三文治 遊園．茶記

呢間懷舊港式茶室除咗提供港式食物同中菜，仲將芫荽元素加入車仔麵同三文治，車仔麵嘅湯底加入濃郁自製嘅芫荽醬都未夠，仲要成碗都鋪上芫荽，完全係荽，全部都係荽！夠晒重口味。

荽指數：🌿🌿🌿🌿

炸茜漢堡 TAP The Ale Project

人氣精釀啤酒店TAP The Ale Project喺荃灣同旺角都有分店，芫荽黨友去到記得叫芫荽漢堡！用本地屠宰免治牛、牛胸尖肉、車打芝士同沙茶蛋黃醬製作，重點當然係勁爆多嘅芫荽疊到高一高，夠晒juicy。

荽指數：🌿🌿🌿🌿

芫荽意粉、漢堡、意大利飯 素年

呢間幾有名氣嘅素食店都有推出芫荽主食，３間分店都各有一款特色芫荽料理。荃灣分店有芫荽意大利飯，深水埗汝州街分店係芫荽漢堡，而深水埗福華街分店就有芫荽意粉，仲有芫荽檸檬梳打添。如果想試勻晒佢哋嘅特色芫荽食物，真係要逐間逐間集郵喇！

荽指數：🌿🌿🌿🌿

芫荽火鍋 令和鍋物酒場

壓軸登場嘅係成兜都青bb嘅芫荽火鍋！呢個芫荽湯底足足用咗1斤芫荽同鮮雞湯打成，熬足7個鐘，濃厚清香，最緊要係芫荽味香得嚟，就算淥牛淥雞都唔會蓋過咗食物嘅原味呀。餐廳仲有唔同嘅芫荽小食，例如芫荽炸蝦餅同芫荽牛肉卷，不過小食嘅芫荽味較淡，平時對芫荽冇乜好感嘅人都可以一試～

荽指數：🌿🌿🌿🌿🌿