【呻慘】自家曲奇被指有致癌物 謝霆鋒嘆星二代做生意「係容易啲死！」

謝霆鋒日前接受一個財經節目訪問，分享其以藝人身份做生意的歷程，自言第一桶金來自「買磚頭」，因為他19歲開始拍戲，當日將賺回來的錢都用來買樓，一來不懂得其他投資，二來覺得磚頭不會走，再之後他便把投資得來的錢開後期製作公司。

現年38歲的霆鋒，14年開始拍美食節目《鋒味》，翌年便創立自家曲奇品牌，當主持提到名人、星二代做生意有利亦有弊，霆鋒非常有同感，即時回應說：「係容易啲死！」他又以自己為例，「好似喺兩個月前，有產品報告測試市面上58款曲奇致癌物，我嘅曲奇列入咗名單，但係報告冇詳細列明究竟食幾多先有問題，而我哋嘅曲奇喺咁多測試嘅產品中致癌成份係好低，可能加上我做幕前工作，媒體就會以我嘅品牌作為標題，所以係有啲唔公平。」

霆鋒直指該報告未能反映事實全部，因為進食分量才是關鍵，他說：「譬如話食維他命會死，但原來係講一日食50樽，咁梗係會死啦；或者話『食白飯會有糖尿病，因為入面有糖。』唔通唔食白飯？所以要講埋『如果你一日食500碗白飯，你係會有糖尿病。』如果冇講清楚，其實係誤導緊消費者。」

霆鋒續謂：「好似坊間睇到『有機』兩個字，通常以為係好嘢，但其實係買貴咗兩、三倍，疑問又嚟，香港對『有機』嘅準則喺邊度？對『食物安全』嘅準則，其實好模糊。我哋每個產品後面都有營養標籤，請好多世界知名嘅實驗室去Test，但係擺出嚟賣嘅時候就因為呢個模糊嘅機制而出現問題，其實幾唔公平，最慘係我成為標題，就有人睇。」講到未來在這方面的發展，霆鋒坦言最希望可以設立一個統一和清晰的食物安全機制。