【咁驚做乜?】講囡囡笑晒口 王浩信一提陳自瑤即封口

【咁驚做乜?】講囡囡笑晒口 王浩信一提陳自瑤即封口
【咁驚做乜?】講囡囡笑晒口 王浩信一提陳自瑤即封口

王浩信今日喺會展出席活動,佢透露今個聖誕節,因為要去佛山拍攝一部網絡電影至年底,所以要喺工作中度過,問到囡囡會唔會唔開心?王浩信話:「佢越嚟越明白,佢知道爸爸控制唔到工作嘅時間,多謝佢哋明白。」咁會唔會買聖誕禮物畀囡囡?佢就話:「其實我成家人嘅環保意識好強,佢對物質冇強烈嘅要求,不過我都會諗有心意嘅嘢。」至於拍完網絡電影,會唔會一家人去旅行?佢話:「1月又要再拍TVB劇,角色、劇本都好吸引,所以我好期待。」

提到今日係冬至,係咪會一家三口食飯做節?王浩信話:「成家人都會食飯,仲會一齊睇《兄弟》大結局。」講到《兄弟》劇情,江嘉敏有意摑醒佢,搞到又被網民話佢經常畀對手摑,王浩信就笑言:「呢刻會停止,觀眾都睇到厭,我都痛!」咁囡囡有冇睇?會唔會心痛爸爸被打?佢就話:「應該冇睇,費事嚇親佢啦!」問到同太太陳自瑤現時嘅關係?王浩信即刻示意唔講家事。