【唔做黃慘盈】新聞主播不求美若天仙 黃紫盈：太靚聽唔到你講乜

「永恆亞視」耐不耐就有新搞作，最近喺網上平台開創全新時事資訊節目《香港追擊搜》，除有「台柱」朱慧珊外，仲找來靚女，前無綫主播黃紫盈（Connie）同周嘉儀加入。黃紫盈日前喺中環接受《蘋果》專訪，佢話對亞視充滿信心：「我覺得班底幾好，有活力，有一個平台能夠健康成長，開心嘅。今次幾得意，唔係純做新聞主播，仲會分享個人感受。」

唔經唔覺，紫盈已經離開無綫5年，曾做過宣傳人員、公關、主持、自組製作公司拍旅遊節目，還教小朋友做小主持及推售美酒等等，瓣數多多。

紫盈直認係一個好怕悶嘅人，當初大學畢業，因為記者冇位，半推半就下才轉做主播，佢話﹕「我嗰時問老細(上司)有冇得採訪㗎，剩係讀稿好悶，好想多啲走動見識世界。咁啱嗰幾年就發展24小時新聞台，要度大量新橋同做節目，做人訪、research、分析數據、天氣報告都要度埋，好似讀多幾年大學咁，但好玩嘅。」紫盈話以前試過一星期，連續返朝早9點，至晚上12點先離廠，雖然瞓得少，但過程卻有好大滿足感。

做新聞主播，靚樣係咪有著數？紫盈話：「我靚唔靚就見仁見智啦，未至於係典型靚女，但有少許觀眾緣。好多前輩話，做主播唔一定要美若天仙，太靚反而聽唔到你講乜，最重要係將訊息話畀觀眾知，所以眼神接觸好重要，每次望鏡頭，就好似同一個朋友講緊一項重要資訊咁。」對於前主播繆美詩曾在專欄中批評有前主播食老本拍廣告搵錢，破壞整個行業的專業及公信力，紫盈另有看法：「我覺得每個人過去做過乜工作，都係你歷史，係你履歷之一，呢個掛勾你唔會專登抹走佢，但同樣接工作要三思，最重要唔好誤導，OK就go ahead。」

講到歷史，相信觀眾對黃紫盈最最最有印象嘅，就係佢報道曼德拉病情時在鏡頭前落淚。有傳紫盈當時與另一主播張文采爭權，後者答應「頂更」，隨後反口，黃紫盈因受委屈流淚；又有傳紫盈失人心，張文采忍讓多時才會「爆」。相隔5年，紫盈仍未肯解開疑團，佢笑話：「或者十年後再問我啦，咁耐喇，牽涉第三者就算啦。每人都有自己故事，好值得勉勵大家，就係唔好以偏概全，唔好一、兩件事就將個人定型，做好每一件事人哋就會keep住搵你(工作)。我都會犯錯誤，但唔做好、唔更正就冇人幫到你。」

是否年輕時做事太衝動？紫盈話：「我係一個有原則嘅人……無分貴賤高低都要向觀眾負責，幾年前我更加執著，想呢個世界完美啲、理想啲，哈哈。但呢幾年心境改變咗，遇到同自己唔同理念嘅人，會花多啲時間理解同磨合。」張文采上星期結婚，紫盈直言一直冇聯絡，如今亦無需聯絡，而自己嘅感情世界，佢話﹕「健康正常，唔急嘅，細個會諗住25歲要成家立室，現在就鍾意冒險，唔想困住自己。」

採訪:嵐山
攝影:沈健程
場地﹕HITE JINRO PUB
Makeup & Hair : Joe Ma