【唔怕得罪方丈咩】鄭中基提議拍美男廚房 方力申寸無綫：嗰個係假㗎

鄭中基(Ronald)昨晚繼續在紅館開騷，爸爸鄭東漢、囡囡Emma及陳明熹等人一齊演出，未知是否玩得太忘形，Ronald老貓燒鬚，中段唱《想愛你》時一度甩嘴，結果他忍不住笑自己發台瘟：「真係唔好意思，咁多晚都未試過，唱咗咁多次都唔知點解會咁，我哋嚟多次好唔好，我唔容許自己咁。」

嘉賓方面就找來當年曾一齊主持《美女廚房》的梁漢文(Edmond)和方力申(小方)，Edmond問觀眾：「有冇掛住我哋？」小方接着說：「定係掛住嗰啲屎味魚蛋，或者坑渠水味意粉呀？」在旁的Ronald問大家是否10年沒看《美女廚房》，Edmond即話：「人哋最近有做。」小方又說：「嗰個係假㗎。」台下觀眾即刻大笑，Edmond說：「你都癲癲哋，以前你話啲奶假，而家就話個節目假？」

Ronald提議大家再做一輯美男廚房：「因為我哋已經有家室，唔可以亂咁食嘢。」小方即話：「變咗嘅係你哋兩個，上晒岸升晒呢，得我Single，想當年我唔係Single，嗰陣我就安分守己，今日就要食自己。」Ronald笑說：「你想快啲媾到女就去投胎啦。」小方即刻話：「我真係好需要，好耐冇搞，真係好想搞，搞番個節目！」

Ronald和Edmond即贊成，小方就話：「等我聽日返去TVB傾傾先。」Ronald接着說：「唔一定要TVB嘅，而家有ViuTV㗎嘛！」Edmond就稱新一年要有大志，不如索性直接搞電視台：「個台名我都諗埋㗎喇，就叫做T Viu B！」然後Ronald就話要集資搞電視台，於是即起歌唱《財神到》，到觀眾席逗利是集資，他們笑言：「集資完畢，而家會盡快開台！」