【唔止鄭伊健】姓鄭藝人鍾意住淺水灣？呢位退隱天后住近億豪宅

最近有報章影到鄭伊健喺淺水灣屋企落街食燒味飯，行返屋企仲順路去海灘望下海，chill到爆！伊麵向來「作息有時」，近期拍下廣告同新戲之後就潛心留家做打機宅男，有傳媒幫佢計過數，有幾層樓揸手嘅伊健估計有1.5億物業喺手，淺水灣間屋已經過6千萬，難怪可以咁他條。

小編順手睇下資料，唔少明星住淺水灣就梗架啦，原來好幾位都姓鄭！咁巧合，開個街坊會啦不如。

鄭秀文

有睇Sammi IG都認得佢屋企幅紅磚牆同埋個廚房，呢度就係佢喺淺水灣海峰園嘅屋企，市價估計7千萬左右。Sammi手上至少有3間物業喺淺水灣，其中喺南灣花園嘅單位堪稱Sammi風水屋，因為佢早喺出道2年後，即係1990年以323萬買入，而家市值至少3千萬。而Sammi老公許志安亦喺淺水灣道冠園有單位在手，位置喺正海峰園隔離，早年有傳安仔將呢間屋俾外父外母居住﹐方便Sammi照顧家人。

鄭中基

早排喺演唱會多謝太太Sammie（余思敏）嘅「暴龍哥」，多年前已經住喺淺水灣麗景花園。2018年，Ronald爸爸、前唱片公司高層鄭東漢就以2億6千萬出售呢間獨立屋，埋單賺2億。而家Ronald住返呢區，睇Sammie po嘅家居相見到空間寬敞，最緊要係見到一家四口開開心心。

鄭裕玲

Do姐都係淺水灣名人之一，住喺區內名廈Manhattan Tower多年，當年同前度男友呂方同居都係住呢度。雖然住豪宅，但係Do姐投資物業唔多，因為97金融風暴令佢持有嘅舊山頂道物業帳面蝕4成，之後就唔再買磚頭。

彭羚

終於唔係鄭姓藝人！退隱樂壇多年嘅彭羚(Cass)同老公林海峰，住喺老牌豪宅南山別墅高層，2個人咁低調又點會請記者去屋企影家居相？但係Cass近年都喺IG分享生活片段，意外令家居環境曝光，屋入面有間房專為Cass而設，有齊佢做Gyrotonic運動嘅器材，更加有無敵海景！同屋苑類似單位上個月有成交，價位係8千萬，估唔到原來林氏伉儷咁有米。

容祖兒

祖兒2018年透過「公司買殼」嘅形式，購入淺水灣道56號嘅雙號屋，據知成交價2億，祖兒因為用呢個方式避過「樓市加辣」稅項，慳返6千萬！祖兒已經住喺呢間豪宅，從照片見到屋企有個櫃專門擺歷年樂壇獎項，相當霸氣。同一屋苑嘅名人業主仲有Juno麥浚龍，而早幾年名媛薛芷倫以近2億出售上址物業，估計賺咗1億4千萬！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！