【喺東京淨係撞到千嬅】撐明哥世紀合照冇影 劉浩龍：我同朋友去咗食飯

師兄劉浩龍今日喺紅館為慈善音樂會綵排，師兄女友容祖兒同舊愛何韻詩，日前都去咗日本撐黃耀明開騷，仲影咗張世紀合照，搞到Fans好大反應，炸爆咗ig，阿菇何韻詩急留言叫Fans冷靜。

張世紀合照，師兄冇入鏡，初時有人諗會唔會係師兄操刀負責影，但實情係師兄根本就冇去睇明哥個騷，所以大家應該諗多咗喇！而且祖兒都話咗張相係英皇同事影嘅！

不過師兄就承認去咗東京玩咗幾日，佢話：「係呀！我同朋友去。」係咪撞到佢哋成班人？師兄輕鬆口脗話：「我冇撞到喎！我撞到楊千嬅渣淨係。」見到張世紀合照咩感覺？師兄笑笑口話：「誇張啲啦！我覺得，好普通成班朋友去支持明哥，呢張相好緊要，係代表我哋好團結，香港嘅歌手一齊去支持明哥，我覺得係好健康嘅嘢！」大家同一個年代，會唔會勾起好多回憶？師兄坦言：「冇諗過你講嗰個年代。」

係！冇錯，師兄係去咗東京，但就輕輕帶過話係同「朋友」去，又話一班人去撐明哥係代表香港嘅歌手團結。當晚明哥喺新宿區開騷，問到佢有冇去撐明哥？佢就咁答：「冇呀！我同朋友去咗食飯，message咗明哥話去唔到喇！good show啦！去咗幾日，之後冇假放，要排舞。」

師兄冇去捧場，反而係同朋友去咗食飯，又話「香港歌手要團結」，難得去到東京都唔去捧場，寧願揀同朋友食飯，會唔會係為咗避免尷尬呢？