【囝囝去北京遊學】魔童獨自辦登機手續過關 靚靚慨歎:他長大了
藝人袁詠儀(靚靚)同老公張智霖生嘅獨仔張慕童(Morton),今年已經11歲,雖然年紀仲係好輕,但靚靚話個仔其實都幾早熟,好識思考,所以佢不時要同佢講道理,絕對唔可以擺出父母大晒嘅姿態同佢溝通。
日前魔童就要去北京遊學,囝囝要離開父母身邊,作為媽媽嘅靚靚當然唔放心,當日佢就親自送個仔去機場,不過,當到機場時見到魔童自己一個人喺櫃枱、好淡定咁辦手續嗰陣,佢就喺facebook出post讚囝囝醒目:「Morton前幾天離開了父母保護的安全區,跟隨學校到了北京,看到他能有條理的處理行李和證件,看到他跟朋友的背影,真的要真說他長大了!」仲post咗幾張魔童喺櫃枱Check in、過關及搵登機閘口嘅相添。雖然魔童已經大個仔應該開心先係,不過靚靚就反而有啲媽媽嘅感概:「突然有點酸酸的,媽媽也要學會放手!Love u Morton!」