雅虎香港新聞 【回顧2021．娛樂】 今年必睇非港產劇集推介！除咗《魷魚遊戲》仲有咩？
仲有幾日就到2022年啦！《魷魚遊戲》、《華燈初上》、《紙房子》第五季及《艾蜜莉在巴黎》第二季等人氣劇集，唔知大家睇晒未呢？不如而家就同大家重溫2021年必睇海外神劇，以下嘅台劇、日劇、韓劇及歐美等劇集，相信總有一套啱你心水！
《艾蜜莉在巴黎》第二季
Netflix愛情喜劇《艾蜜莉在巴黎》第二季（Emily in Paris 2）喺日前（22日）正式上架，上季開播後大受歡迎，主要講述Emily（Lily Collins飾）由美國芝加哥被派到法國工作，除咗職場嘅挑戰之外，佢仲要面對愛情、友情及文化差異嘅疑難。今季嘅故事將會延續上季，Emily會繼續留喺巴黎工作，仲會與Gabriel及新歡Alfie展開四角戀情。
《紙房子》第五季
人氣西班牙犯罪劇集《紙房子》唔經唔覺嚟到最終第五季，今季繼續以警匪鬥智作為主軸，講述里斯本成功進入西班牙銀行與同伴團聚，可惜教授被艾莉西亞搵到藏身地點並抓住，導致無法與銀行內嘅同伴溝通，東京（Tokyo）亦為咗救同伴而犧牲自己。艾莉西亞喺中途誕下女兒，之後教授更與艾莉西亞談判，最終令佢投向其陣營，並幫助佢哋尋找被劫黃金下落，成為教授嘅最強後援。
《安眠書店》第三季
愛情驚悚劇集《安眠書店》（You）第三季主要講述Joe與Love已經榮升新手爸媽，並搬到北加州展開新生活，不過Joe一去到已經搵到新目標，仲令Love大開殺戒將佢殺死，最終佢哋更加互相廝殺。除咗濫殺模式啟動之外，跟蹤及密室囚禁等等嘅經典戲碼都會再一次重現眼前。
《魷魚遊戲》
如果要講今年大熱劇集嘅話，相信唔少人都會話係韓劇《魷魚遊戲》！劇集利用人類嘅童年回憶揭發人性嘅殘酷，暗諷韓國社會弱肉強食嘅道理，劇集一上架就引起全球追劇熱潮。劇情主要講述456名經濟困難人士收到有圓圈、三角形與正方形嘅神秘名片，邀請佢哋喺6個遊戲關卡中相互競爭，以爭奪456億高額獎金，每個遊戲都係韓國人細個玩嘅傳統遊戲，包括一二三，木頭人、椪糖、拔河、彈珠比賽、過墊腳石橋及魷魚遊戲，關卡難度逐漸增加，只有玩到最後嘅玩家先有機會攞到獎金，過唔到關或者中途離場嘅玩家都會賠上性命。
《Penthouse》
韓劇《Penthouse上流戰爭》主要圍繞江南區100層公寓「Hera Palace」有錢人爭權奪利嘅故事，雖然劇集冇超大卡士陣容，不過憑誇張手法、狗血及高潮不斷劇情，成功令收視及討論度節節上升。
《地獄公使》
韓劇《地獄公使》係繼《魷魚遊戲》後，再有原創韓劇成功奪下多國嘅排行榜冠軍。劇集由劉亞仁、朴正民及金賢珠主演。劇集以韓國黑暗邪教末世為題材，主要講述事人們喺無預警嘅情況下收到「天使」（地獄使者）嘅死亡通知。當時限一到，地獄使者就會將佢帶往地獄審判，同時亦令「新真理會」崛起。《地獄公使》集驚悚、血腥、邪教等於一身，中意睇呢類型劇集嘅朋友，千祈唔好錯過呀！
《以吾之名》
韓劇《以吾之名》由韓韶禧、朴熹洵以及安普賢主演，劇集主要講述尹智友（韓韶禧飾）為亡父報仇，因此潛入警隊成為臥底警察，一來可以查出兇手，二來亦可以為社團提供有用資料。今次韓韶禧剪去一頭長髮，由最強小三轉型做打女，令唔少觀眾相當驚喜。
《黑道律師文森佐》
韓劇《黑道律師文森佐》由宋仲基、全汝彬及玉澤演主演，主要講述黑手黨顧問朴柱亨Vincenzo Cassano（宋仲基飾），因為組織內部糾紛而喺意大利逃到韓國，之後仲遇上流氓律師洪車瑛（全汝彬飾），佢哋仲會一齊以暴制暴。宋仲基喺劇中經常以有型西裝造型登場，加上精湛演技及一口流利意大利文，成功令人氣再一次上升。
《華燈初上》
台劇《華燈初上》演員陣容相當華麗，包括林心如、楊謹華、楊祐寧、鳳小岳、郭雪芙及張軒睿等等，劇情主要講述1980年代台北紅燈區的日式酒店—「光」嘅媽媽生Rose（林心如飾）同Sue（楊謹華飾）同甘共苦，不過就為咗一個男人而爭風呷醋，之後慢慢出現互相猜忌及背叛。早前第二季嘅預告已經釋出，並預計喺本月30日正式Netflix獨家上線，相信唔少觀眾都好期待呀！
《莫測高深一女生》
泰國懸疑影集《莫測高深一女生》以驚悚校園故事為題材，講述神秘聰明嘅娜諾（Chicha Amatayakul飾）係一個不停轉校嘅女高中生，揭露學生同老師嘅人性陰暗面，只要有佢嘅出現，就一定會腥風血雨。喺第二季更加入新角色「由理」，同娜諾鬥法。劇集獲得全球好評，連帶女主角Chicha Amatayakul人氣急升兼被封為「泰版水原希子」。
《侍女》第四季
神劇《侍女》（The Handmaid's Tale）過往三季都口碑極佳，更橫掃多個頒獎典禮嘅獎項，去到第四季同樣冇令人失望，劇情依然非常緊湊和刺激，身在極權主義國家Gilead嘅June一直渴望拯救女兒Hannah，今季佢變得更加黑暗、憤怒及渴望報仇，令身邊越來越多人喪生。其好友Moira喺救援途中遇見June，幫助佢成功逃到加拿大，並與老公Luke重逢。
《女傭浮生錄》
迷你影集《女傭浮生錄》（Maid）改編自《紐約時報》暢銷書榜作品《Maid: Hard Work, Low Pay, and a Mother’s Will to Survive》，劇情講述單親媽媽Alex當上女傭工作，期間受盡冷言冷語及低薪，不過佢為咗擺脫受虐關係，及令女人過更好嘅生活，堅毅嘅佢依然保持樂觀嘅態度去面對困難。
《太陽召喚》
《太陽召喚》（Shadow and Bone）喺5月上架時火速紅遍全球，除咗集奇幻、魔法、愛情等元素於一身之外，唔少觀眾都被男神班巴恩斯（Ben Barnes）吸引，佢喺劇中飾演大反派「闇主」（The Darkling）凱利根將軍，連女主角阿利娜都同佢有感情戲。劇情主要講述世界被隔絕為兩部分，一名女戰士發現統一王國嘅力量，並努力練習掌控呢種能力，期間世界處於戰爭，危險不斷襲來。
《東大特訓班2》
日劇《東大特訓班》喺2005年播出時大受歡迎，連帶劇中主要演出人氣急升，《東大特訓班2》相隔16年終於播出，除咗有阿部寬及長澤雅美再度出演之外，仲搵嚟及川光博、江口德子、鈴鹿央士及細田佳央太等人主演，劇中主要講述律師阿部寬與現職律師嘅舊生長澤雅美重返校園執教，並帶領一班問題學生考入東京大學。去到大結局時，新垣結衣、小池徹平及紗榮子驚喜現身，仲有山下智久獻聲演出，睇到童年回憶即時返晒嚟呀！
《日本沉沒~希望之人》
日劇《日本沉沒~希望之人》改編自經典小說《日本沉沒》，並搵嚟小栗旬、松山研一、杏、香川照之等人演出，陣容相當鼎盛。劇情主要講述環境省官員天海啟示（小栗旬飾）係一個為咗喺政界上位而不擇手段，期間田所雄介（香川照之飾）發表一個巨大災難嘅預言，令到佢喺政途面臨巨大阻力。劇集成功吸引唔少觀眾收睇，全劇平均收視達15.8%，成為今年周日播放劇集嘅收視冠軍。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
