【堅持人手新鮮製作】觀塘人氣芋圓店重開 新出香濃焙茶圓+台式飲品

各位芋圓控又可以去觀塘食手工芋圓啦!呢間人氣甜品店上個月正式重開,地方大咗有堂食座位。食物選擇都多咗,招牌手工三色芋圓當然繼續供應,仲有新出嘅配料,包括選用日本深焙茶粉嘅焙茶圓、口感爽滑嘅桃膠等。仲有一系列台式同港式飲品都係新登場。

負責人阿Yan(左)同Karl(右)表示好多謝一路以嚟遇到所有支持、畀意見佢哋嘅人
負責人阿Yan(左)同Karl(右)表示好多謝一路以嚟遇到所有支持、畀意見佢哋嘅人

芋圓控新店位於觀塘富利工業大廈11樓B舖,如果係熟客會知道其實就喺舊舖隔離,一出電梯聞住芋頭香就唔會行錯方向啦。依然由阿Yan同Karl呢對年輕情侶檔主理,招牌芋圓、地瓜圓、紫薯圓,到新出嘅焙茶圓都堅持自家製,例如芋圓由蒸芋頭、搓粉團、切芋圓、煮芋圓都係全人手。而且每日新鮮煮,絕對唔留隔夜,無添加防腐劑或色素,難怪兩度搬舖都仲有咁多熟客。

三色分立($42)
三色分立($42)

三色分立($42)

可以試勻招牌三色圓:芋圓、地瓜圓、紫薯圓,每粒都好飽滿,表面軟滑、咬落Q糯彈牙,間中又會食到少少原材料嘅顆粒。三款都食得出食材本身嘅味道,紫薯同地瓜嘅甜味比較突出,而芋圓咬多幾下都會漸漸食到天然甜香。

芋圓、地瓜圓、紫薯圓
芋圓、地瓜圓、紫薯圓

裡面仲會有小芋圓、寒天晶球、西米,同一款自選汁(仙草汁/黑糖汁/椰汁/淡奶/4.3牛乳)。小芋圓口感更為軟糯,因為同樣有顆粒所以都食到芋頭同地瓜淡淡甜味。寒天晶球口感爽脆,西米就比較Q彈,整體口感層次非常豐富。

自選DIY($36起)
自選DIY($36起)

自選DIY($36起)

自選DIY就可以自己配搭唔同配料,好似阿Yan就幫開飯仔揀咗呢個配搭:桂花凍、焙茶圓、芋泥球、桃膠、白玉丸子。桂花凍係自家製,特別揀蒟蒻粉代替坊間常用嘅魚膠粉,素食朋友都食得;另一貼心點係煲完之後會先將桂花隔走,令桂花凍充滿花香又唔會食到成口粒粒。

新出嘅桃膠同焙茶圓
新出嘅桃膠同焙茶圓

大推新出嘅焙茶圓,阿Yan透露因為特別揀用日本深焙嘅焙茶粉,雖然成本較高但比起淺焙茶粉嚟講茶香更濃郁,令焙茶圓越嚼越香!桃膠口感相當爽滑,本身無乜味道所以夠百搭。芋泥球同樣係自家製,質地非常綿密,芋頭香氣濃郁而且甜度適中。

(左)三十元奶茶($30),(右)芒椰甘露($32)
(左)三十元奶茶($30),(右)芒椰甘露($32)

(左)三十元奶茶($30),(右)芒椰甘露($32)

三十元奶茶靈感嚟自台灣常見嘅平價奶茶,佢哋就靈機一觸諗到國語「三十元」同「三色圓」好似,就喺奶茶當中加入小芋圓同三色圓!奶茶嘅奶味比較重,唔會過甜,加埋軟糯嘅小芋圓都係唔錯嘅配搭。不過三色圓用粗吸管都吸唔起,記得打開杯蓋用羮食埋呀喂。

芒椰甘露就用咗新鮮芒果肉、紅柚肉、芒果汁、椰汁調配,唔知係咪因為過咗當造期所以芒果略酸,勝在味道自然,配埋紅柚肉同椰汁平衡返都好順喉。

桂花凍都係自己整,Karl會特別隔走桂花,令口感更為滑溜
桂花凍都係自己整,Karl會特別隔走桂花,令口感更為滑溜

由一開始同小食舖夾份、之後有自己嘅舖位,再到而家做埋堂食,阿Yan同Karl都好感謝一班熟客。Yan指知道客人食得出佢哋嘅手工芋圓同一般嘅有唔同,希望之後可以開分店等更多客人可以嚟食。

Karl就特別感謝一開始搵佢哋創業嘅朋友,幫佢哋踏出重要嘅第一步。阿Yan同Karl亦要特別多謝屋企人:「無論我哋人手、或者資金有問題,佢哋都會即刻第一時間跳出嚟幫我哋。如果人手唔夠嘅,嗰日就會請假過嚟幫我哋預備所有材料。」

想嚟食芋圓兼支持佢哋嘅話提醒返,小店現時星期日休息,未有得打電話或其他方法嗌定外賣或者Book枱,麻煩預定時間嚟Walk-in啦。

芋圓控
地址:觀塘駿業里6號富利工業大廈11樓B號舖