雅虎香港新聞 【大家都知嘅...】唔怕倫敦金靚女騙局 方力申：幸好小弟見慣美人
方力申（小方）同麥長青（麥包）組成新拍檔，今日喺灣仔警察總部內拍攝港台節目《警訊》，兩人飾演倫敦金騙徒，並笑稱呢個組合係小麥方包。
小方話有《警訊》還未出生，節目比自己更年長，能拍到節目係夢想之一，做奸角之外，佢主動要求在片尾同警方齊齊呼籲巿民切勿輕易受騙，佢話：「要跳出嚟做番個好人，我做《美女廚房》俾人話我鹹濕兼口花，拍完做騙子都怕俾人鬧我呃人，我要同好多慈善機構交代。」
有冇成為倫敦金美女目標？小方話：「我好同情嗰啲被氹到嘅人，始終英雄難過美人關，幸好小弟見慣美人，冇咁易中招，人不可以貌相，我都成日叮囑老豆唔好易受騙，唔好亂簽文件。」小方即使工作都好保障，會收晒錢先做，較少爛尾情況。
麥包和江美儀老友又經常合作，坦言不知美儀與吳君祥離婚一事，仲話：「呢幾日好多朋友鬧我，話乜美儀單身兩年唔出聲，可以追佢。」麥包稱自己已婚，好少問人係咪單身，最緊要美儀開心。美儀自稱有情緒病？麥包話：「吓！係咩？可能拍《街市遊樂團》玩得太開心，我哋幾個都有情緒病，經常玩到癲。」不過美儀竟話忘記自己結過婚，係咪真係記憶力衰退？麥包話：「唔會，過去事唔再諗，展望將來，你睇個個都話追佢，大把巿場，唔使擔心。」
精選娛聞，喺晒《娛果》
