【大廚教你揀靚生蠔!】將軍澳即開蠔吧+歐陸菜館 招牌鹽焗法國春雞

·4 分鐘文章

踏入秋冬,即係又到食歐洲生蠔嘅季節啦!但應該點揀生蠔?點食生蠔?今次就搵嚟將軍澳呢間主打即開時令生蠔嘅歐陸餐廳廚師教大家幾個小貼士,食「蠔」仲要食得「好」吖嘛。餐廳仲有唔少用各地精選食材炮製嘅創意菜式,打卡必點香草鹽焗法國春雞啊。

22 Branch Oyster Bar & Restaurant今年8月於將軍澳海天晉滙開張,仲有露天座位,吹下海風感覺零舍Chill。門口一角就係蠔吧,擺滿嚟自世界各國唔同品種嘅當季生蠔。
 

教你點揀靚生蠔!

坊間有「夏天食澳洲蠔、冬天食歐洲蠔」嘅講法,副主廚Johnny就話原來係睇生蠔生長環境溫度,冬天海水溫度越低,生蠔為咗過冬會養肥自己,所以就會越肥美飽滿!所以九月至四月要食北半球例如法國、愛爾蘭等地出產嘅生蠔。

是日精選新鮮即開生蠔($208/半打,$388/一打)
是日精選新鮮即開生蠔($208/半打,$388/一打)

生蠔要點揀?Johnny教落一個字:重!夠重即係裡面海水夠多夠新鮮,亦代表蠔肉夠肥美。相反如果唔夠重,或者蠔殼已經爛咗,裡面嘅海水流失,代表生蠔喺運嚟香港嘅途中好可能已經一早死咗喇。

揀完生蠔咁又要點食好?最基本嘅由淡食到濃大家應該都知,Johnny再畀多個小貼士:先食蠔肉再食中間嘅帶子!因為帶子係當中最鮮甜嘅部分,最後先食帶子就可以中和口腔裡面生蠔嘅海水鹹味。
 

時令生蠔推介

愛爾蘭路易費莎生蠔($58)- 適中海水味、餘韻帶杏仁香、爽口鮮甜
愛爾蘭路易費莎生蠔($58)- 適中海水味、餘韻帶杏仁香、爽口鮮甜
法國特級柏德多婭生蠔($68)- 蠔味更重、有青瓜香氣、海水鹹味適中
法國特級柏德多婭生蠔($68)- 蠔味更重、有青瓜香氣、海水鹹味適中
西班牙銀堡壘生蠔($78)- 鮮甜帶堅果味、餘韻香甜
西班牙銀堡壘生蠔($78)- 鮮甜帶堅果味、餘韻香甜
法國吉拉多生蠔($88)- 海水味及蠔味四款中濃郁、裙邊爽脆、帶子鮮甜、蠔肉飽滿
法國吉拉多生蠔($88)- 海水味及蠔味四款中濃郁、裙邊爽脆、帶子鮮甜、蠔肉飽滿

更多【新店直擊】:
1. 融合咖啡x酒吧x科技 銅鑼灣新開5500尺概念旗艦店
2. 京都和菓子老店登陸荃灣 新店必食期間限定班戟+九宮格御膳
3. 【以美食開啟第二人生】天后新開無框架Fusion菜館 招牌鮮麻花椒拉麵

 
招牌菜+Brunch推介

香草鹽焗36日法國春雞($238)
香草鹽焗36日法國春雞($238)

用厚厚嘅鹽同香草包住36日法國春雞再生焗,更準確控制熟度,而且鎖住更多肉汁。廚師更特別放上燒過嘅香草,一上枱先聞到草本香氣,然後用附上嘅木槌敲開鹽殼,拍片打卡一流!

敲完鹽殼可以請廚師切件,春雞皮薄肉嫩又多肉汁,鹹香突出。
敲完鹽殼可以請廚師切件,春雞皮薄肉嫩又多肉汁,鹹香突出。
5小時慢煮美國優質威靈頓牛柳($388/半份,$688/份)
5小時慢煮美國優質威靈頓牛柳($388/半份,$688/份)

唔係間間歐陸餐廳都有威靈頓牛柳,皆因工序相當繁複,但呢間餐廳就唔單止有供應,仲特別先將USDA Prime級牛柳慢煮五小時,鎖住肉汁,唔單止食落更Juicy,亦令外層嘅酥脆保持乾爽鬆脆。酥皮同牛柳中間就跟足傳統做法,加入一層以意大利風乾火腿、荷蘭啡菇、鵝肝、燒汁等製作嘅鵝肝醬。

威靈頓牛柳酥皮金黃酥脆
威靈頓牛柳酥皮金黃酥脆

焗出嚟嘅威靈頓牛柳酥皮金黃酥脆,厚切牛柳鮮嫩多汁唔過韌。同底部嘅菠菜、蒜頭一齊食更可以減少油膩感。

燒西班牙脆皮乳豬南瓜意大利飯 ($228)
燒西班牙脆皮乳豬南瓜意大利飯 ($228)

乳豬皮薄到好似一張紙咁,肉質又保持到嫩滑,原來係靠先慢煮再拆骨,帶出豬肉膠質後再燒香,逼出多餘油分同時又令乳豬充滿脂香。因此乳豬皮食落好似薯片咁香脆,豬肉唔會太肥又有肉汁。下面嘅南瓜意大利飯就選用味道香甜嘅本地南瓜製作,醬汁Creamy濃厚。

招牌香烤波士頓龍蝦班尼迪蛋(平日17:00前供應,$198)
招牌香烤波士頓龍蝦班尼迪蛋(平日17:00前供應,$198)

班尼迪蛋大家可能都食過,但有埋原隻波士頓龍蝦嘅版本又試過未?Johnny指知道香港人而家越食越高要求,而且想畀多啲選擇大家揀,所以就諗到龍蝦班尼迪蛋喇。

班尼迪蛋嘅重點水波蛋熟度啱啱好,半熟蛋黃緩緩流出睇到都覺得好療癒。波士頓龍蝦肉質爽彈,味道鮮美。

餐廳副主廚Johnny
餐廳副主廚Johnny

 

訂座:22 Branch Oyster Bar & Restaurant
地址:將軍澳唐俊街28號海天晉滙地下G06號舖




文:Cathy.H
相、片:Wilfred Chui

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能