【失憶24小時】唔想對住前夫吳積遜 江欣燕自揭當年搬返娘家原因

·2 分鐘文章
唔想對住吳積遜 江欣燕自揭當年搬返娘家原因
唔想對住吳積遜 江欣燕自揭當年搬返娘家原因

《失憶24小時》收視平平,但係劇中江欣燕(欣欣)同張達倫飾演藕斷絲連嘅離婚夫妻,包辦全劇親熱鏡頭,張達倫之前喺YAHOO TV《娛樂訪談》更大爆欣欣非常專業,拍床戲近乎冇底線,幾乎全裸咁滯!訪問片段喺YAHOO爆多人睇,我地就呢個講法搵返當事人欣欣講兩句~

「其實邊個在乎我有冇底線,我有底褲咪得囉!」欣欣劈頭就咁答,佢仲話好驚訝張達倫眼中自己原來咁專業,並且向觀眾澄清自己唔係赤條條上陣拍床戲,有打底有黐pad,就算有時移咗位,欣欣費事影響投入角色情緒,寧願快快手拍完。

同張達倫合作愉快,欣欣憶述佢地第一日開工就要拍車震戲,但係當時仲未熟絡,最多只係知對方係黎芷珊個前度。至於車震,欣欣坦言現實中冇經驗,甚至要同導演研究喺司機位定乘客位「進行」,傾傾下先知原來大家都未試過咁玩!

劇中角色經歷離婚,現實中欣欣都有類似經驗,同結婚12年嘅吳積遜喺2013年宣布離婚。當時有報導話吳財政出現困難,而欣欣亦好少交代離婚原因。喺《娛樂訪談》入面,欣欣講起婚姻結束前,突然腦裡有個諗法,「我唔應該喺度嘥時間,唔想再喺度對住你(前夫),我想返屋企對住佢2個(父母)」。就係咁,欣欣決定同嘅吳積遜攤牌,「我三日後會搬走,希望你唔好阻止我」,簡單地告一段落。

欣欣慶幸回家陪爸爸度過晚年,2016年江父因癌症過身,但係走之前欣欣又想獨立,因為突然發覺咁多年來未試過一個人住。「我連想點樣佈置間屋都唔知,由細到大同屋企人住,結婚之後有人俾錢買傢俬,你跟佢style就得,究竟我想點呢?」。終於年半之後搬入元朗過獨立生活。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!