【娛樂問呢啲】樂壇係咪已死?街訪樂迷︰一日有新人一日都唔會死

·2 分鐘文章
樂壇係咪已死?街訪樂迷︰一日有新人一日都唔會死
樂壇係咪已死?街訪樂迷︰一日有新人一日都唔會死

年頭姜濤拎叱咤「我最喜愛的男歌手」,成為最年輕得主,但就有人認為未夠班,仲斷言「樂壇已死」。呢句說話激發填詞人小克創作《樂壇已死》,仲喺半個月時間由0開始,搵到唱作人吳林峰譜曲、王雙駿負責編曲監製,更搵到一班年青音樂人自動請纓合唱。去年拎到冠軍歌但就被戲稱係「乜水」嘅MIRROR成員Jer(柳應廷)亦都客串唱埋一份。

到底樂壇係咪已死?YAHOO TV新節目《娛樂問呢啲》就走入街頭訪問年青樂迷。普遍年青人對廣東歌態度正面,有受訪者話「樂壇根本冇死過,只係冇人重視」,亦有意見認為只要多啲留意新人,其實佢地嘅作品唔輸蝕俾前輩,甚至話「一日有新人一日都唔會死」!樂迷亦都寄語歌手要不忘初心,亦唔駛多理會「樂壇已死」呢啲言論。

不過都不得不承認,歌手知名度要搵辦法提高先得。《娛樂問呢啲》仲搵到《樂壇已死》作曲人吳林峰幫手主持,順便聽取樂迷心聲。唔少人聽過《樂壇已死》,但就唔知企喺眼前嘅就係首歌嘅作曲人,更有人問「林峰?」。反而有受訪者記得友情客串嘅Jer,再次證明MIRROR人氣幾勁!

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!