【專訪】轉做業餘拳手後首開腔 Rex要增磅唔用得流「星」拳

「今日唔知聽日事,先做好現在想做嘅事吧!」說這話的是31歲的香港不敗拳王曹星如,對香港年輕泳手杜敬謙上周不幸在訓練中猝死有感而發,他說:「以前我係懶惰鬼,唔識珍惜光陰,浪費好多嘢,現在學識『活在當下』。」大膽問結婚4年多的星如可有生B計劃,他表示「順其自然」,大家等他的好消息吧!

自從去年11月30日修頓室內場一場業餘表演賽後,星如就埋頭苦練,準備6月一連串的東京奧運外圍賽,今年第一次見他,看他人消瘦了點,前額頭髮有點長,他笑說很久沒剪頭髮,2017年底跟河野公平撞腫的左額仍有一小粒凸起,幸好視力已恢復正常,鏡頭下看到星如那六嚿腹肌仍在,可見他一直努力訓練,為東京奧運備戰;下月初將到廣州跟中國國家隊集訓兩個月,小記未開口,「愛妻號」的星如已說:「我會逢周六、日返嚟香港嘅。」

記得2017年他打第22場職業賽對河野公平前,小記曾問他何時生B,當時他曾說過:「生BB責任好大,或者再過兩年吧!」現在到了「找數」年,雖然訪問中未肯多講,但卻是他第一次答「順其自然」,他說:「我係好鍾意小朋友,現在玩緊姨甥女,造人嘅話,順其自然,唔想畀自己一個限期。」

近期杜敬謙離世的消息令香港體壇感到十分惋惜,星如雖然不認識他,但感觸良多,他表示:「我覺得唔單止係運動員,每個人都係今日唔知聽日事,有自己想做嘅,盡量去珍惜,盡量去嘗試。」

其實,星如在今個月初曾在IG上寫着:「儘管做自己想做的事吧!」跟活在當下不謀而合,他說:「主要係之前比賽受傷後(指對河野公平一仗),差唔多休息咗大半年至9個月,回想過去,有些曾經有嘅機會錯過咗,所以嗰一刻諗,距離東京奧運唔係太遠,就想試下,加上奧運有40歲上限嘅限制,所以想把握現在去試一試,雖然唔知成唔成功,只想試一下。」

星如坦言,衝擊奧運不為證明甚麼,只是覺得香港很多年沒有人參加奧運拳擊,想試一試,尤其過身的曹爸爸曹樹仁不但是兩屆亞運代表,亦曾想參加奧運,可惜當時因資源問題落了空。另一個原因,是星如自己也曾嘗試爭取2008北京奧運資格,只可惜外圍賽第一場就輸了,他憶起當時也不禁搖搖頭:「當時我仍係懶惰鬼一名,靠打天才波,冇好好準備,現在多咗時間去認真準備奧運,想繼2008後再向東京奧運目標努力。」香港只有羅漢北及李金華出戰過1964年東京奧運,事隔56年,2020年又返回東京辦奧運,且看星如能否為港爭光。

為東奧毅然放棄職業拳賽,星如連磅數也「升呢」至57公斤(約125.6磅),跟以前職業的115磅增了10磅,主要原因是業餘比賽的模式是早上過磅,下午比賽,日日如是,若由32強打至決賽,總共有五天都要keep磅,若保持職業時的115磅,跟自己平日128至132磅的體重相距太遠,有難度。

問到星如對爭東奧是否充滿信心,他表示:「真係唔知道,我從未試過喺業餘國際賽晉級,唔知能否適應到日日過磅這賽制,甚至業餘賽就算你贏咗第一圈,翌日過磅同體檢時見你受傷,都唔可以繼續比賽,我只可以講努力準備中,尤其東奧拳擊嘅命運仲未有決定。」東京奧運是否繼續有拳擊賽仍是未知數,因為國際拳總醜聞多多,包括貪污及在2016年里約奧運拳擊比賽中,裁判出現偏幫等等,現時國際奧委會已將國際拳總的權力凍結,最新消息指國際拳總主席拉希莫域本月中宣佈辭職,對東奧拳擊是個好消息,國際奧委會將於6月作最後決定。雖然很多未知數,星如還是會照原定計劃下月初到廣州跟中國隊集訓,希望在一眾高水平、同樣爭東奧資格的高手「學嘢」。

在2017年10月最後一場職業賽對河野公平時,星如因左眼被撞腫而被裁判終止比賽,星如當時以68:66點數勝出,眼前的星如,左眼上只留下細細一粒腫起的印記,問他可會因河野已退役而感到遺憾,他坦言沒有,反而未有機會對8屆WBO(世界拳擊組織)世界拳王的日本「怪物」井上尚彌感到有點「可惜」:「我跟河野已經比過賽,唔會有遺憾,反而同井上未正式打過有啲可惜,但將來或者有機會遇到佢都唔出奇,都係未知數,期待將來有機會。」

養傷期間,星如笑言最難受是看到朋友網上發放的拳擊相:「見到朋友甫打拳相,我心郁郁想打埋一份。」由2011年至2017年的職業生涯,星如共累積了22連勝,就欠一個世界冠軍金腰帶,問他是否留後路重返職業拳擊的最大心願,他說得有點玄:「頭銜呢樣嘢唔想講到好在意話一定要攞,時機來到就自然會來,唔係我好想要就一定有。」都是那句,今天盡力而為,讓明天變得更好。

星如左眼上留下細細一粒腫起的印記。
星如左眼上留下細細一粒腫起的印記。
為東奧毅然放棄職業拳賽,星如連磅數也「升呢」至57公斤(約125.6磅),跟以前職業的115磅增了10磅。
為東奧毅然放棄職業拳賽,星如連磅數也「升呢」至57公斤(約125.6磅),跟以前職業的115磅增了10磅。
結婚四年多的星如可有生B計劃,他笑言「順其自然」。
結婚四年多的星如可有生B計劃,他笑言「順其自然」。
星如下月初將到廣州跟中國國家隊集訓兩個月。
星如下月初將到廣州跟中國國家隊集訓兩個月。