【幫大台拍特輯】同周柏豪爭獎 張敬軒：冇分加，只係收咗隻TVBuddy

張敬軒噚晚喺「第41屆十大中文金曲『用心‧聽』音樂會」頒獎禮成為大贏家，第一次攞到優秀男歌手大獎，佢嘅表演環節更悉心安排，搵咗台灣大環藝術家楊世豪同舞蹈家梅卓燕合演，軒仔笑言今次好重本：「想將自己演唱會一part，抽咗精髓擺上今次舞台，自己演唱會嗰part係講生死輪迴，今次呢part係講回憶，邀請台灣大環藝術家嚟。」問到成本係唔係佢負責，軒仔表示：「公司淨係畀咗錄音同混音錢，係千幾二千蚊，道具、排練場地等費用由港台負責。」

提到楊世豪簽證邊個負責，佢就話唔清楚：「通常邀請呢啲外來人士，佢哋都會搵製作公司去做，今次呢part由導演負責，但係邊度簽證我唔知。」再問到之前有冇擔心攞唔到簽證，軒仔自言冇諗過：「基本上喺9月、10月落實有呢part，諗住邀請佢嚟，所以當時冇諗咁多。」

講到第一次攞優秀男歌手大獎，軒仔自言呢個獎係「Oversize」：「自己喺之前嘅頒獎典禮(叱吒)發咗台瘟，唔記得多謝Eason，因為今年派好多歌，Eason會send message鼓勵自己，同埋好老實講係Eason畀機會我哋呢班後輩，好似每一次有歌派會畀啲好鼓勵性同好肯定性嘅說話大家，佢真係好錫我哋呢啲後輩，同畀意見我哋。雖然o依家樂壇市道唔好，但係樂壇嘅氣氛係好健康，大家公平競爭去做，我嘅機會都係多謝一班樂壇前輩，好似有種接棒感覺。」

問到佢係唔係冇咁快交棒，軒仔表示：「我訂下嘅目標係一路去，就算自己唔參加個比賽仍然會出席，用一個支持態度，如果自己身體許可，都會一路坐落去，因為要對呢個場合要珍惜，今日唔知聽日事，唔係下下都可以老馮上台，所以應該盡量支持。」問到點慶祝，軒仔就話仲有一個頒獎禮，記者笑言係唔係要拎埋大台嘅「最受歡迎男歌手」先慶祝，佢話：「又唔係咁講，每一個台有自己機制，加上雖然今年喺四個台派歌成績好好，四個台都有冠軍歌，但個人獎項有好多因素。」講到大台頒獎禮，軒仔覺得邊個係勁敵，佢笑言：「唔好話邊個勁敵，不如講有咩人入圍，好似有胡鴻鈞，仲有柏豪，佢喺歌影視三線發展都好好，好似大家叮噹碼頭，自己輸蝕啲，因為影視兩方面都冇成績。」記者就提佢之前咪幫大台拍咗音樂特輯，會否加分，軒仔笑言：「嗰啲攞唔到分嘅，我只係收咗隻TVBuddy，不過呢啲音樂特輯當廣告時段嚟買係好貴，自己今年唱片銷量成績係好，但始終都未去到基仔、克勤同Eason當年嘅影響力，所以2019年都要努力去做。」

另外，楊世豪表示今次嚟香港簽證冇問題：「張敬軒跟我說簽證與機票都沒有問題。」對於早前台灣閃靈樂隊因簽證問題嚟唔到香港演出，佢就表示有聽聞：「因為簽證問題，我來香港才知道，但我很幸運，有機會來到香港演出。」問到佢會唔會覺得香港比起台灣言論自由少咗，佢表示：「肯定是，但台灣現在也很複雜，太敏感的我就不多說，希望下次可以再來香港，因為很喜歡在台上與張敬軒演出的感覺。」