【年初割11cm嘅腫瘤】52歲林利拍劇休克撼傷頭 留醫半日返家休養

52歲嘅林利，今年2月接受周刊訪問時，透露患直腸癌第二期末期、接近第3期，今年1月尾佢去聯合醫院做手術，割咗個超過11cm嘅腫瘤，但佢1月29號做完手術出院，2月2號就跑咗上台為當年小虎隊隊友胡渭康擔任嘉賓，之後又為黎小田演唱會做嘉賓，4月拍完無綫劇《鐵探》幾個月，近日又即刻為另一部新劇《殺手》開工，完全冇休息冇停過。

今日有消息傳出，林利為《殺手》開工期間受傷爆缸流血，被送醫院急救。《蘋果》記者打畀林利了解，佢話：「今朝凌晨4點幾喺觀塘開工，係咁拍打戲，到下晝2點突然間休克咗幾分鐘，同事call白車送咗我去聯合醫院，我休克嗰陣，個頭撼落地流咗少少血，醫生幫我照過晒腦同心電圖，話我冇乜大礙可以出院，我o依家喺屋企休息緊，估計都係攰得滯。我自己睇番轉頭真係搏得滯，做完直腸手術都未停過，但有時機會嘅嘢，自己又唔想錯過……錯過咗就唔知有冇㗎嘛。」記者話佢冇健康身體邊有命繼續搏殺，佢就話：「都係嘅，呢幾日都唔會開工住㗎啦，會好好休息吓。」

林利仲話:「舞指及導演其實都好遷就我架啦，但始終自己身體狀況未完全恢復，相信休息一排冇事架啦。」