【從影40年夢醒】做演員只夠勉強吊命 高俊文為生計做保安:真係會死

現年60歲、有「綠葉王」之稱嘅高俊文,喺78年第7期藝員訓練班畢業之後加入無綫,喺演藝圈從影40年,先後參與過唔少劇集演出,扮演唔少專業人士,例如《學警出更》做教授、《通天幹探》、《怒火街頭》及《律政新人王》做法官等等,又同鄧萃雯拍過《巾幗梟雄之義海豪情》等劇。04年更憑《下一站彩虹》獲提名萬千星輝賀台慶嘅「我最喜愛實力非凡男藝員」,直到13年,高俊文轉投王維基旗下的香港電視網絡。

可惜過咗檔之後,對事業似乎冇乜大幫助,因為一男子嘅因素,令到港視不獲發牌,之後好少見到佢再有作品推出,直到日前有周刊報道指佢已經轉咗行做保安,更稱自己唔會再涉足影視工作。

高俊文日前接受《蘋果》電話訪問,講到點解會有呢個決定,佢話:「其實一直都好少工作,得番配音同有啲戲做吓,不過唔多,叫做吊住條命唔使死,但係慢慢覺得好頹,連女朋友都話『咁樣唔得喎』,冇晒鬥心,之後經濟有啲問題,加上又投資失誤,慢慢諗咁樣唔掂,真係會死,要搵番份正職,唔好再發明星夢。」佢仲話:「呢個決定諗咗非常之耐,我報讀嗰個高級保安課程之後,個心都係15、16,我都唔知點樣去面對自己,個心真係好掙扎,不過都OK,原來做保安都要攞牌,要上156個鐘頭嘅堂,都冇諗過,對我嚟講都有啲辛苦,但係最後都讀咗2個月,考試PASS咗,係一級認可資格。」

畢業之後第一份工係去咗一間連鎖超市工作,高俊文話:「嗰陣真係好掙扎,成個商場都人來人往,好難頂,不過我都要面對,要向一個超難度嘅地方進發,可能我係一個演員,慣咗面對群眾,所以一路試工都冇問題,做得幾好。」佢續話:「點知有你哋行家過嚟搵我,話有人同佢哋報料,所以咪過嚟了解吓,其實嗰陣都有啲忟憎,心情又忐忑,點解我只係想過一個平靜嘅生活,都要滋擾我呢?你知做演員嘅心態係好矛盾同複雜,好彩我自己都好樂觀,試咗之後又覺得可以,所以呢啲問題都可以適應,我真係要多謝呢個讀者,令到全行都知道我轉咗工。」

適應只係第一步,事實上呢條路真係好難行,高俊文話:「你問我係好定唔好,我都唔知,可能幫到我喺事業方面有啲進展,亦都可能因為太惹火而唔敢請我,我平常心喇。」唔知公司有冇詐型呢?佢就話:「公司啲人都對我好好,你知我都年紀唔細,如果再向社會踏足,又能夠做到啲乜嘢工作?可能有啲人見到你咁,畀啲嘢你做,做到退休,都無謂嘥彈藥,o依家咁樣仲好,唔需要再有啲尷尷尬尬,自己都可以面對,我都希望可以畀到一個正面訊息,既然行得走得,點解唔靠自己?我仲做得嘢,要腳踏實地搵份工,希望可以自己提升自己,由散仔做起,慢慢升做組長、主管,過咗70歲就會轉做看更,到時就退休。」

至於係咪真係唔再拍劇,高俊文就話:「我唔會抹殺所有可能,如果有人搵我,我都好老實同人講,我做緊保安,返夜班,如果認為我啱就直接開工,就唔好做casting,始終要夾一夾啲時間,要休息先可以做。」不過高俊文都有感而發話:「我唔係因為唔再喺呢一行而語無論次,之前又話中港一家親,但係又會有演員限制,其實係抹殺啲演員嘅機會,尤其嗰啲冇乜知度嘅演員,但係我又睇唔到嗰啲代表業界嘅議員做緊乜嘢,我睇見啲人鬧啲劇集好膠,其實都幾傷感!」

(資料圖片)
(資料圖片)
有「綠葉王」之嘅高俊文,78年嘅第7期藝員訓練班畢業之後加入無綫,喺演藝圈從影40年。(資料圖片)
有「綠葉王」之嘅高俊文,78年嘅第7期藝員訓練班畢業之後加入無綫,喺演藝圈從影40年。(資料圖片)
13年高俊文轉投王維基旗下的香港電視網絡,因為一男子嘅因素,令到港視不獲發牌。(資料圖片)
13年高俊文轉投王維基旗下的香港電視網絡,因為一男子嘅因素,令到港視不獲發牌。(資料圖片)
高俊文日前接受《蘋果》電話訪問,講到點解會轉行有呢個決定。(資料圖片)
高俊文日前接受《蘋果》電話訪問,講到點解會轉行有呢個決定。(資料圖片)
佢話:「我真係要多謝呢個讀者,令到全行都知道我轉咗工。」(資料圖片)
佢話:「我真係要多謝呢個讀者,令到全行都知道我轉咗工。」(資料圖片)
我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能