【成人派對】陳敏之慶祝40歲生日 007型男+Bling Bling索女登場

 敏之提早慶祝40歲生日,孖老公李乘德一齊出席。(Ig圖片)
敏之提早慶祝40歲生日,孖老公李乘德一齊出席。(Ig圖片)

今個月17日係陳敏之嘅40歲生日,一大班好朋友日前為佢搞咗個生日Party提早慶祝,除咗老公雷偉信,仲有胡杏兒及老公李乘德、伍詠薇、袁偉豪、陳山聰、黃致豪、嚴淑明等,非常熱鬧。

由於今次係「成人」派對,小朋友冇份,敏之就諗咗以007為派對主題,噚日佢喺ig貼咗唔少相,大部份嘉賓均以Cool爆黑色禮服登場,而敏之可以話係萬綠叢中一點紅,着咗件bling bling衫,閃耀全場。

敏之貼相後留言﹕「多謝大家陪我玩了一個瘋狂的晚上,大家都好靚,Love u all,Happy40,一個難忘的生日。」敏之仲喺文尾hashtag「#各位老闆型到核爆#大會指定007造型#被咁多靚仔圍係正嘅#真心喜歡主題派對」,睇嚟真係玩得好開心。

胡杏兒就貼咗佢同老公跟敏之兩公婆影嘅合照,佢話難得兩個老公可以咁friend,杏兒話﹕「恭喜你Baby,恭喜你踏入20對但仍然咁靚咁索,雖然睇到你平坦嘅肚腩真係好想打你,但其實我哋都真係要感恩大家都有一個咁錫自己嘅老公,佢倆個仲要咁friend,仲有我哋可愛的囝囝,年尾到我了,我都會同你一樣開心及自信地迎接20對,多謝你個party畀我哋個個dress up,40對時再搞記得預埋我兩公婆,總之身體健康開開心心心想事成!!」

問到生日願望,敏之今日回覆傳媒時話:「身體健康!囝囝乖乖聽話!開開心心!」點解搞主題生日派對?佢話:「17號係40歲,所以今年想特別啲,搞吓dress code畀大家留念,有個美好回憶!所以,男仕扮007,女仕要 Bling Bling。」成人派對?佢話﹕「冇小朋友,因為玩得夜,怕他們生病。」

好熱鬧,足見敏之人緣好好。(Ig圖片)
好熱鬧,足見敏之人緣好好。(Ig圖片)
一班型男與壽星女敏之影大合照。(Ig圖片)
一班型男與壽星女敏之影大合照。(Ig圖片)
仲有姊妹(Ig圖片)
仲有姊妹(Ig圖片)
敏之同杏兒都搵到個錫自己嘅老公同生咗小朋友,好幸福。(Ig圖片)
敏之同杏兒都搵到個錫自己嘅老公同生咗小朋友,好幸福。(Ig圖片)
杏兒都就快「20對」,不過有個好老公同囝囝在身邊,幾多歲又有乜所謂吖!(Ig圖片)
杏兒都就快「20對」,不過有個好老公同囝囝在身邊,幾多歲又有乜所謂吖!(Ig圖片)
蛋糕都配合番主題,007 + Bling Bling。
蛋糕都配合番主題,007 + Bling Bling。