【成tag之路】汪阿姐自創新招hit爆 鄭裕玲揭真相：佢唔知乜嘢叫hashtag

喺上個月先加入ig行列嘅「阿姐」汪明荃，你咪睇佢ig齡甚淺，佢喺ig界掀起咗一陣熱潮，佢自創咗一個#汪阿tag，即係喺張相上用手寫人名當tag，結果唔少ig友都跟足阿姐個玩法。

「嘟姐」鄭裕玲噚日喺商台嘅節目大爆汪阿姐點解做咗「汪阿tag」，嘟姐話：「其實喺好多年前已經叫阿姐玩IG，好好玩，點知阿姐話『我唔玩，o依家一個微博搞到我頭都暈，我唔玩！』」嘟姐話幾乎每次見到阿姐都有游說，但係都打動唔到佢！點知阿姐o依家玩到出神入化，嘟姐話喺台慶開騷前，捉緊機會問吓阿姐，佢就話：「你都唔知，我唔係想領導潮流，唔係想搞宣傳，但係我都唔明，啲人影完合照之後，成日叫我hashtag，我都唔知乜嘢叫hashtag！」

嘟姐講吓講吓就繼續爆：「阿姐又話自己個明荃之友嘅網址，有時同啲公職人員合照之後，阿姐自己寫番人哋個名喺上面，之後叫同事喺網址上完相再加番啲名入去，所以佢咪索性一次過搞。」嘟姐仲話：「大家都係處女座，不過阿姐比我厲害，佢直頭會接番條線同俾返個title，又唔會阻到大家，你話佢係咪好可愛？阿姐有陣係好嚴肅，但係有啲嘢又估佢唔到！」

阿姐今朝更新咗IG，佢先貼咗一張汪阿tag咗「流感針」嘅相，留言話：「溫馨提示： “老友記”記得打流感針！」之後再嚟多張「午安」嘅相，查實早兩日阿姐已經識得hashtag，佢tag自己話：「我就是IG紅人。」