【我係邪惡HR】好馬真係不吃回頭草？（HR小薯蓉）

「好馬不吃回頭草」呢句說話好多人都掛喺嘴邊作為人生座右銘。
「返撻舊愛？我顏面何存？」
「返去舊公司做？實畀人笑我撈唔掂。」
實情又係咪咁？少年你唔好咁天真，安仔Sammi都結咗婚，霆鋒王菲都蜜運緊。其實有冇諗過，如果你真心相信「好馬不吃回頭草」呢句說話，可能會錯失好多珍貴嘅機會？

做咗HR咁耐，見過唔少人選擇食回頭草，可以返番舊公司做嘅，通常都係表現出色嘅一群。試諗下，點解老細會選擇請返佢返嚟？而唔選擇請過個新人？一來可能因為佢熟手，二來至少表現要唔差。我就見過有一個例子，有一位員工叫花花，佢喺食人花公司做咗5年，本身學歷唔高，勝在因爲做咗5年咩都上曬手，表現日漸得到上司嘅認同，不過因為佢想吸收下其他經驗所以離開咗食人花公司。過咗兩年，老細搵返佢返嚟食人花公司做，結果返嚟之後平步青雲，迅速爬上管理層。

當馬兒返到舊公司，佢地會同自己講：「今時唔同往日喇，我係畀人挖返嚟做嘅。」好自然佢地會有一份使命感，要回要報老細嘅知遇之恩。亦因爲咁，佢會做得特別賣力，以顯示自己嘅能力畀老細睇：「你搵得我返嚟，我一定幫到你手。」除咗做畀老細睇之外，亦都要做畀身邊嘅同事睇，我係有能力，先至值得老細搵我返嚟。

當一個人返到熟悉嘅環境，唔需要從新適應，啲嘢一拎上手就識做，唔同新人要花返一頭半個月先開始上手。憑住佢地嘅熟悉、加上老細對佢嘅信任，所以上位可以上得好快。最重要嘅係，食回頭草嘅同時，因為夠熟手，對人工嘅bargaining power都大啲。繼我話，食回頭草嘅都係識食之人，千祈唔好笑佢地食回頭草，分分鐘眨下眼做老細。

作者：HR小薯蓉