【我的置業故事】二千萬樓畀一半首期 80後陳太：投資賺番嚟，冇得教！

80後從事金融業的陳太，去年中以約2,000萬元買入北角柏蔚山三房單位，其後樓價轉勢，長實（1113）「樓神」趙國雄更於去年12月預測今年樓價跌2成。買樓半年，樓市似轉勢，陳太深信那只是樓市調整，不是冧市，認為「有需要咪買囉，價錢又啱自己預算，我會覺得咁就係最好嘅時機。」

陳太買入柏蔚山，無非為兒子。「本身住天后單幢樓，大仔2歲，細仔啱啱出世，但屋苑無設施。」去年5月柏蔚山開價，遂以約2,000萬元買入一個3房單位，實用808方呎，呎價約2.5萬元。首期支付一半，即約1,000萬元，80後陳氏夫婦打工未夠十年，沒有賣掉天后單位，仍有千萬首期買多一層樓，從事金融業的她坦言：「筆錢係我同老公儲番嚟，屋企都有幫手，亦有一路投資賺番嚟。呢啲無得分享，有人炒樓會發達，有人炒樓會破產，無得教。真係無乜心得，人人背景、際遇都不同，對唔同投資產品又有唔同興趣。社會上好多投資班，我成日諗，如果我係佢，我仲要開班，收人錢，靠呢份糧維生，係咪真係一個投資高手呢？你唔會見到畢菲特開班教人投資囉！」精打細算的她還考慮到單位日後安排，「單位可投資，又可以自住，幾年後小朋友去九龍區讀書，呢度要出租，這個面積會比較容易。」

不過樓市去年下半年開始轉勢，長實「樓神」趙國雄預期今年樓市跌2成，她認為：「經常睇新聞話劈價劈價，你睇到係地區性。樓市係咪真係轉勢呢？未必。你睇中半山傳統豪宅區，好多有實力業主供斷晒，係咪急售，劈價賣樓呢？一定要一大班人，突然好多供應先可以拖低整個市場嘅價錢，係咪真係有呢個情況出現？我唔係好覺。」

她又指出，公私營房屋比例調整至7比3，雖然公屋將會愈來愈多，但需求尤在，「等好耐又抽唔到嘅人會轉去買細啲嘅私樓。需求一直存在，我唔覺得樓市會突破轉向，或者好似有人講跌三、四成，甚至五成，我自己就唔係咁睇。跌10%係調整，我唔會形容為冧市。市場總有調整，唔好睇得太複雜，來來去去都係講緊升跌2個字，出現都係一半機會，邊個有水晶球可以睇到個市點走呀！」

「四叔睇股市睇咁多年，有咁多資訊，佢都未必睇得準，更何況我作為一個市民，只能憑自己分析去決定係咪一個啱嘅時機，你無可能永遠係best timing去買樓，如果個個都做到咁，咁咩叫最好時機，你覺得呎價2.1萬叫最好時機，自然就會預期呎價1.8萬元。」那麼去年買樓是否最好的時機，她回應：「你有需要你咪買囉，咁價錢又啱自己預算，我會覺得咁就係最好嘅時機。」

記者：陳家雄
攝影：鄒潔珊