【改名陳樂庭】媽模Mia去年再婚嫁有米山東男 Ig洩密陀BB豬

上周三剛過30歲生日嘅媽模陳靜儀（Mia），近年消失於娛樂圈，佢去年被踢爆釣得金龜、28歲山東男薛雨，立即閃嫁，Mia仲改名做陳樂庭（Flora），佢將以往Mia開嘅社交網徹底鏟走，索性用新名過新人生同新生活，徹底洗底，連社交網都設為私人帳戶，重新選擇朋友圈。

Mia出道時，不介意賣肉出寫真，除倒瀉32C奶，又爆出16歲時奉子成婚，成為話題女郎，Mia跟前夫莊家傑育有一子一女，長女現已12歲，囝囝都已10歲，兩名子女交托嫲嫲照顧。Mia跟前夫莊家傑關係麻麻，13年時，莊家傑閃娶無綫節目《求愛大作戰》中嘅盛女Whitney，Mia開火狂踩前夫，莊家傑即還拖反擊Mia嘅指摘。

回復單身嘅Mia，唔使湊一對子女，佢樂得再覓第二春，佢去年閃嫁時，婚宴低調，未有邀請圈中朋友。再婚後嘅Mia享受做闊太，佢不時喺社交網貼出外遊照片，仲有全身名牌。不過從Mia社交網貼出近照看來，Mia的樣子顯得有點陌生，佢跟出道時已變得臉目全非，佢嘅變臉技巧日見精湛進步。

Mia噚日再放閃，今次仲有喜訊，佢就貼出喺峇里享受陽光與海灘嘅照片，穿上黑色沙灘裝嘅佢腹部隆起，原來Mia即將再做媽咪，今年會為現任丈夫添個BB豬。老公視覺下嘅Mia，笑容燦爛，陀B嘅Mia保持心情開朗，近日貼出嘅照片都係吃喝玩樂。企喺水邊嬉水作樂嘅Mia，作狀華麗轉身，變身美麗孕婦，但佢手腳未見水腫，仲係好纖瘦。Mia又坐喺沙灘，佢坐下嘅沙灘寫了I love再加箭嘴，睇嚟老公真係好有心思。Mia仲喺Instagram晒出收到老公送嘅名牌鑽石手鈪，禮物盒旁有老公水嘅心意卡，Mia留言：「Happy birthday to me,thank you my love小可愛。」同時貼出老公赤膊向海背影。