【政情】爆馬國明住址被鬧 趙家賢呻遭欺凌

東方日報 OrientalDaily
趙家賢連出兩個貼文,同網民展開空中罵戰。(互聯網圖片)
趙家賢連出兩個貼文,同網民展開空中罵戰。(互聯網圖片)

尋日娛樂圈驚爆藝人黃心穎同「人夫」許志安被踢爆喺的士偷情,頓時成為全城焦點,大批傳媒更聚集喺黃心穎男友馬國明位於港島東某個大型屋苑住所樓下。東區區議員趙家賢第一時間喺社交網站貼文,大大隻字話自己作為該屋苑嘅民選議員,已要求管理公司特別加強馬國明居住大廈嘅保安措施,防止閒雜人等進入。點知引來網民質疑佢洩漏藝人住址,係踢爆人哋嘅個人私隱。

一度刪貼文 後又辯解

趙家賢見狀,好快就刪咗個貼文,以為佢知衰喇,點知冇耐佢又重新出一個新貼文,仲用好多tag去辯解,例如「有關藝人的物業資料傳媒早已報導(道)」、「唔知頭唔知路就喜歡網絡欺凌」等等,結果引來更多網民批評,有人話自己原本唔知馬國明住邊,依家知嘞,仲鬧佢係「豬一樣的議員」。又有人話佢係藉事件抽水喎!

你可能還想看