【新盤熱潮】港人港地陰影 「維港1號」開價更「唔合理」？

位於啟德跑道區的矚目新盤「維港1號」即將開價，成為首個擁有無敵海景的跑道盤開賣。睇番發展商同系同區「港人港地」「啟德1號」往績，呎價會唔會「更唔合理」？

下載Yahoo財經APP
美股、外匯、加密貨幣免費即時報價，自選投資組合獲取相關新聞提示。

港人港地風波

「港人港地」由前特首梁振英於2012年提出，原意是緩和香港居民買樓問題，政府於2013年推出兩塊「港人港地」地皮（即現為啟德1號）。根據地契條款，項目只可賣給香港永久性居民。

「啟德1號」於2016年推出首張價單，售價介乎582萬至1,466萬不等，呎價高見15,080至18,418元，折實呎價最平都要12,741元，面積更只得386呎，售價要成492萬元，被市場議論當時賣得貴。

不過，該盤發展商中國海外地產高層豪言，「特首無講話以合理價錢俾香港人買到，只不過係俾香港人優先買物業。」佢唔明白，為何傳媒認為高過市場或者係不合理。

其實，就算市場認為樓價幾唔合理，發展商認為佢哋開價永遠「都是合理」。

維港1號單位最細329呎

「維港1號」由2幢高座及1幢低座住宅大廈組成，合共提供1,059伙，標準單位由1房至4房不等，實用面積為329至1,793呎，戶戶設有22至82呎露台及16至27呎工作平台。

其中逾半單位主打兩房，面積430至560多呎，最細一房單位只有329呎。

另外，低座住宅大樓，共提供10伙分層大宅，實用面積1,781至1,793呎，開則全屬四房。

「維港1號」每呎地價要13523元，而同區恒地從海航手上購入「The Henley」地皮，每呎樓面地價要1.5萬元，較前者更高。恒地「The Henley I」最新折實平均呎價已升至28,866元。雖然「維港1號」地價較低，但景觀唔同，開價有可能貼近3萬，如果去到呢個價，會唔會令市場覺得又「唔合理」？