【昂船洲躉船大火】邊個豪宅最中伏？

有時火警要來就來，無人係先知，就好似昨日昂船洲附近金屬廢料躉船大火，煙霧籠罩整個西九龍，濃煙居然飄到美孚、深水埗、長沙灣、旺角，甚至港島及沙田，都算誇張。

不過，最首當其衝就是西九龍一帶私樓、公屋無一幸免，氣味最濃烈，心曠神怡過日出康城。

下載Yahoo財經APP
美股、外匯、加密貨幣免費即時報價，自選投資組合獲取相關新聞提示。

其中最中伏豪宅，要數南昌站上蓋「匯璽」，以及仲係樓花的「維港匯」，何解？因為最近昂船洲呀。

其實，兩個豪宅盤叫價不平，「匯璽」二手呎價起碼過2.4萬元，而「維港滙」第1期最近過億元賣左個天池屋，連平台及天台共4房，面積過2000呎，仲有私家泳池，呎價要成5.4萬元，破哂項目紀錄。

試諗下，如果你手揸香檳，在泳池嘆緊世界，望住昂船洲夜景，突然爆火警，食正濃煙衝番入屋都算幾狼狽。

話說回來，有時買向海或臨海單位，不一定有景就好，有時都要計計數，打風、海風濕氣少不免。

其實兩個盤最強賣點是海景加鐵路，但有辣有唔辣，以維港匯為例，雖然第1座、第2座、第3A座及第5座部分單位向南，望九龍站維港景色。但第3B座（細單位為主）則座落於後方，向西南方向，穿過垃圾轉運站，望向昂船洲污水處理廠及大橋一帶，今次就真係食到好正。

就算大船著火不是常見，維港匯的住客日後要面對泊岸船隻噴出廢氣問題，加上附近有垃圾轉運站及渠務專用範圍，有時都會走出氣味。

所以，買樓前一定要做好功課，睇樓要實地考察，記住海景不一定係最好。