【星Easy】家有三個小寶貝 曹敏莉(上)：屋企每日都好熱鬧！

03年港姐冠軍曹敏莉10年離開無綫，與相戀五年的男友張家傑結婚。兩個人都喜歡孩子，所以婚後立即趕工造人，如今已經組成五口之家，家裡有三個小寶貝：7歳的大女兒Dora，5歲的兒子Marco，還有下個月就要滿兩歲的小兒子Leo。問到從小期待做媽媽有個大家庭的Mandy還生不生，她也說一天從早到晚圍著兒女團團轉，再生？恐怕忙不過來！

由朝忙到黑 疲但快樂著

聽曹敏莉形容自己五口之家每天怎麼過，隔住個mon也感覺得到又熱鬧又忙碌、媽媽想要片刻寧靜絕對是奢求：「我每日朝早六點鐘起身，搞掂自己就去叫Dora同Marco起身食早餐返學，細佬Leo唔使叫聽到家姐哥哥已經跟住醒埋，好嘈好忙嘅一日就咁開始。跟住送家姐、Marco上校巴，送細佬去返playgroup。下午接Marco放學去踼波打籃球出番身汗，然後輪到送家姐去學普通話、學琴或者Ukulele。夜晚返到屋企練琴、讀故事，食埋晚飯三個八點鐘上床瞓覺，咁就淨番我同先生自己時間。雖然湊住三個細路好困身，但係喺仔女同老公仲有自己身上都要攞到平衡，不過放低仔女談何容易，自己仔女萬事我都希望自己可以跟足，仲有細佬呢仲細個，去到邊都心掛掛，好想快啲返屋企！」

學會同理心 要有責任心

家有三個孩子，有人說會對最大那個特別上心、也有家長會特別寵愛孻仔孻女，會怕時間精力分配不過來？忽略了哪個嗎？曹敏莉說家裡有三姐妹、自己排行第二，事在人為，自己就從來不覺得被忽略，相反三姐妹感情要好甚麼都能分享、總能做到互相扶持：「三個小朋友年紀唔同，需要就唔同。大家姐讀grade 3，每日都問吓佢學校發生咩事？同朋友相處成點，女仔有樣好，好sweet好貼心，特別多心事傾。Marco就好動鍾意體育運動，除咗溝通足夠要瞭解每個小朋友需要時，我特別注重係仔女自理能力同責任心。雖然屋企家務有姐姐幫手，不過小朋友食飯著鞋執書包，我細細個已經叫佢哋學識自己的事要自己負責。唔好怕浪費時間就樣樣代勞，我寧願早啲準備早啲出門口，等佢哋慢慢執好自己袋仔、水樽同著鞋綁鞋帶。我諗大個做乜嘢去到邊都好，有禮貌有同理心、有自理能力、有責任心懂堅持完成自己的事，至係做人最重要嘅品質。」

預告：照顧三個孩子雖然忙碌，可幸也都有靜的一面，Dora會自己主動練琴做功課，也會和弟弟一起坐下來看書，自律和愛閱讀的好習慣從哪裡來？自然是從爸爸媽媽身上學來。

想知更多育兒資訊 請留意Easy Pama