【星Easy】梁芷珊(上):獨女是GCSE狀元 找對方法就能不勞而獲!

蘋果動新聞

愛情走了,親情還在。才女梁芷珊(Canny)與商人羅傑承的婚姻雖然在三年前劃上句號,不過始終還是女兒Eily(羅樂桐)的爸爸媽媽,上個月Eily16歲生日當天、收到女兒GCSE/IGCSE 11A的優異成綪,就第一時間致電分享喜悅:「我話畀羅生聽,得一個女,從來冇催谷過佢就考到呢個成績,係唔係叫不勞而獲,同埋百份百教育成功率呢?講笑啫……我諗係因為我誤打誤撞報一條龍學校畀Eily,佢又真係好適合呢套。我唔係絕對推崇IB課程,眼見同一班小朋友都唔係人人可以適應,講到尾,都係要家長了解小朋友、搵到乜嘢最適合佢哋。」

有錢大晒?唔好抹殺女兒付出
女兒考出11A佳績的新聞一出,讚嘆鼓勵以外,也有不少網友持相反意見,一句講晒:「狀元是用錢堆砌出來!」Canny再三澄清,留學英國,是看成績獲得學位,女兒出色,也並不只是父母身家的功勞:「我記得小學學費大概六、七千蚊一個月,唔係咩貴族學校、亦都算係學費比較平嘅國際學校。當然學費都係一個門檻,但係唔可以話我攞得出呢六、七千蚊,就抹殺咗個女嘅付出。我覺得應該都要畀一啲credit個小朋友,無論佢喺邊間學校,都要學會同人相處、上課留心,要自律交功課,需要處理考試。Eily由細到大,我都唔會谷佢一日返兩間幼稚園、科科補習、課外活動排到滿晒。佢細個學鋼琴、芭蕾舞,放棄就要為自己決定承擔後果,大個去到英國讀書,都知道唔好浪費,攞師兄師姐留低嘅舊書讀A-Math,呢個女都要教,呢個學位都係靠佢自己成績爭取返嚟。」

生不逢時?才女童年讀寫障礙
Eily四年級以前從來不需要考試,中文簡單到連「沙灘」也不會讀、數學乘數表也不會背,Canny說IB先訓練右腦激勵創作,等到孩子一定年紀才訓練左腦,加強記憶和邏輯,就和傳統教育完全相反:「我細個有讀寫障礙,又係左撇子,阿媽唔識教、嗰個年代學校亦都唔會了解我嘅情況,默書永遠唔合格、計數又永遠同老師教係反方向,喺一個淨係得對同錯嘅年代,咪就係所有嘢都得到交叉囉。我覺得對依家啲小朋友,唔可以因為你唔識所以要催谷、一直谷到你識為止,我覺得唔係咁,我喺公司做嘢對住班同事都係一樣,用人要用優點,你唔識,我唔會谷你,畀番你做你最擅長的事,做嘢就自然會做得開心又有目標!不過掉番轉頭講,我都會畀個女知道,做人要發揮所長,但係平衡亦都重要。只係偏重一邊,到頭來唔方便嘅始終係自己。」

預告:兩年前Eily離開父母到英國讀寄宿學校。校園裏每個周末會有活動開派對,向十六歲以上學生提供酒精飲品,不過只限三杯……這一套,梁芷珊不但不覺得大驚小怪,還說跟自己從小教Eily的方法不謀而合。

其他內容