【星Easy】梁芷珊(下):「才女」身份令女兒有壓力!

蘋果動新聞

50歲的梁芷珊,做過model拍過戲,也是記者、作家、編劇、填詞人、電視、電台主持人,婚後為南華足球隊擔任推廣策劃工作、獲得中國百大女企業家獎也兼任保良局總理至今,早就不僅僅是才女,還是獨當一面的女強人。有個周身刀張張利的多功能媽媽,可想而知身為梁芷珊的女兒有多大壓力:「我都試過無意識咁自己係左撇子、想個女同我一樣用左手,教佢作文,用自己寫作嗰一套教佢組織同用詞,直到有一次個女話畀我知,媽咪,你唔好以為你係作家,我就一樣要寫嘢叻做到作家……一言驚醒夢中人,原來嗰一吓我嘅行為對佢形成壓力,令佢以為我對佢嘅期望就係要同我一樣。」

image1
image1
image2
image2
image3
image3


先有底線 然後鼓勵跳出框框
到底梁芷珊的正職是甚麼?她說女兒Eily小時候也試過問同一個問題:「我同佢講媽咪成日都轉行,當一樣嘢做到悶、當對其他嘢產生興趣,唔緊要喎,咪畀自己去試吓囉!我見到好多媽媽教仔女嗰套,係呢樣唔畀、嗰樣又唔得。我唔同,小時候我係同佢講乜都可以做,但係要喺我定嘅範圍之內;到長大以後,放膽去做啦,你會有足夠經驗同智慧知道自己幾時可以突破個框框。好似細細個Eily啱啱開始揸筆畫畫一様,我會攞張麻雀紙出嚟,先畫一個框,話畀佢知呢個係一個界線,為咗安全、為咗乾淨,只要喺個界線裏面,你做乜都得。到佢長大,有一定嘅能力同經驗,就係掉番轉,佢哋會畀個框框自己、呢樣嘢唔敢、嗰樣嘢唔識,呢個時候我就會同佢講,其實界線係自己訂畀自己,乜都可以試,乜都可以做,失敗唔緊要喎!呢一套又同佢學校嗰套好相似,去到咁上下年紀,你越係唔畀、佢哋越係想出去狂歡。不如我提供一個安全環境畀你哋飲,等你哋知道自己嘅底線喺邊。」

image4
image4
image5
image5
image6
image6

真正朋友 欣慰女兒肯聽意見
成績優異、思想又獨立,中學以後把Eily送到英國升學,梁芷珊從來不擔心女兒的自律和自立。不過工作再忙,還是要抽空常常飛到當地陪陪女兒、說說話,因為從小到大,兩母女都是最好的朋友、萬事都能商量:「我最怕聽到啲家長郁啲就話小朋友唔乖,送佢去保良局、咩警察鴉烏會嚟捉佢……教還教,可唔可以係講事實,唔好講大話呢?你對住屋企啲寵物都會講人話時,點解會怕同小朋友講真話?所以我好欣慰,呢個女咩都會同我講,乜都會問吓我意見。佢由幼稚園開始都係同同一班同學朋友長大,中二插班去英國覺得好難打入別人圈子,佢有問我意見、又有聽我講,透過相處同了解,唔好急於打入亞洲人圈子局限咗自己;到佢開始考慮大學揀科,未係好明確知道自己志願,又會聽我講,考完個試先,等成績話畀自己聽擅長邊方面……最終成績全部都唔錯,但係佢肯聽我講,又會自己思考,呢個女,我一啲都唔擔心。」

其他內容