【曾與韓君婷傳斷背情】經理人陳早茵貼身照顧 43歲佘詩曼加晒分

今年43歲嘅佘詩曼，事業就好暢順，最近更憑大陸宮廷劇《延禧攻略》，事業更上一層樓。但係感情方面，自從08年同鄭嘉穎傳緋聞後，近年阿佘都未有對象，dry足咁多年，今日就有周刊報道指，阿佘自從兩年前離開無綫，自組工作室，搵咗同性密友陳早茵做經理人，陳早茵貼身照顧阿佘，報道更指陳早茵同阿佘過從甚密，話佢有「近水樓台」之意喎！

阿佘自出道以來，緋聞男友多不勝數，好似林峯、陳豪、吳卓羲同鄭嘉穎都係佢緋聞男友，但近年阿佘事業上不斷衝刺，成績有目共睹，然而感情生活就好dry，今日就有報道話佢同經理人陳早茵過從甚密，陳早茵就係陳欣健個女，05年曾與韓君婷傳出斷背情，今次報道話陳早茵極力慫恿阿佘開工作室，佢就做埋阿佘嘅經理人，協助阿佘進軍大陸市場，報道指，今次阿佘憑《延禧攻略》喺大陸爆紅，陳早茵都要記一功。

報道嘅知情人士話，阿佘初頭唔想接《延禧》，因為佢覺得自己唔係做女主角，又要做奸角，加上劇種類似《金枝慾孽》，原本就諗住推咗去，但陳早茵就游說阿佘要接呢套劇，最後亦不負佢望，套劇令到阿佘喺大陸爆紅，阿佘自然對陳早茵加晒分。報道仲話，過去兩年陳早茵陪住阿佘走南闖北，陪伴在側，知情者仲爆料話，陳早茵會投阿佘所好，又送花，明眼人都會睇出佢心意，然而知情者就話阿佘只鍾意男仔，唔會變攣喎！

日前阿佘喺香港有活動，周刊就影到陳早茵陪伴在側，更陪阿佘送啲中秋禮品俾佘媽媽，報道話佢同佘媽媽都相當熟絡，佘媽媽更咗一袋水果俾陳早茵。之後陳早茵更陪阿佘到機場，出發到大陸工作。