【有冇親熱戲？】張智霖薛家燕合體 唔做母子做情侶？

張智霖（Chilam）同薛家燕今日喺灣仔出席活動，佢哋以新身份證形象大使身份獲頒感謝狀，家燕姐笑指阿仔剛要換身份證，可以帶埋佢一齊嚟，仲話而家瘦咗影相上鏡都靚啲。Chilam好開心同家燕姐合作，佢話：「我而家黐住家燕媽媽，之前做演唱會嘉賓，畀商戶睇中咗，嚟緊同家燕姐一齊做代言，真係好心有好報，帶挈我真係好！」

Chilam仲話要買份禮物送畀家燕姐作答謝，家燕姐大讚Chilam做事認真又勤力，又好錫佢，Chilam話呢種情係叫真情，問佢哋想唔想再演母子？Chilam話：「要呀！好恨！」家燕姐亦都話好恨，問佢哋想唔想演情侶？家燕姐就話要問靚靚（袁詠儀）先，而Chilam就笑家燕姐好多男朋友，笑言對手太多，唔係咁容易，咁會唔會有親熱戲？Chilam笑話：「嚟真㗎？我哋係親情嚟，時常都有。」

提到老婆靚靚為新戲操到好弗，Chilam則指仲有進步空間，佢話：「佢拍緊真人騷，亦有新戲，好忙，我就減產，同家燕姐一齊。」Chilam話留畀老婆搵錢，問到老婆咁弗，會唔會有壓力？Chilam就話：「唔通你覺得我唔弗咩？演唱會時操到6嚿腹肌，睇番覺得過度瘦，而家就剛好，我純天然冇添加。」至於農曆新年，Chilam就會一家人去日本滑雪，佢話：「阿仔好開心，佢已經冇玩滑板，而家主要玩online game。」