【本來我要講幾句嘢，但畀人刪咗】得獎致詞提及紅線 黃耀明澄清係自我審查

達明一派喺「第41屆十大中文金曲『用心‧聽』音樂會」獲港台頒最高榮譽金針獎，黃耀明喺得獎致詞時講到內容被過濾：「我哋係土生土長嘅香港人，我哋一直以熟悉嘅廣東話唱出香港人故事，希望大家守住廣東話同埋我哋嘅文化，我哋經歷過香港嘅盛世同衰落，喺聖誕聽到有人播黃霑唱嘅聖誕歌提及鄧小平，令我諗起達明都唱過幾位領導人，來自百無禁忌嘅8、90年代，本來我要講幾句嘢，但畀人刪咗，今日我哋呢個城市到處都係禁忌，到處都係紅線。」

喺後台受訪時，問到明哥刪咗啲咩？佢答：「我係我行我素，但都要照顧中間同我哋合作嘅人嘅憂慮。我都會自我審查」達哥即問：「咁邊個刪？」明哥就認係自己所為：「係我自己刪嘅，喺人哋舞台始終唔方便講，其實我想講國歌法、國旗法等等嘅嘢，嚟緊有更加多嘅紅線影響香港，創作自由會更加低，令香港本身有嘅特色冇晒。」咁可惜嗎？明哥直認：「當然啦。」

問到呢啲情況會唔會影響達明創作？達哥話：「唔會影響達明創作，但工作影響好大。」明哥就話：「因為我哋要堅持創作，要付上代價，就係冇工開，多謝唱片公司陪住我哋。」

喺頒獎禮上，達明話要送個金針獎俾阿妹盧凱彤，明哥話：「阿妹係我哋出第一隻碟嗰陣出世，同埋今日大家都好掛住佢。」佢又話心情平伏咗一段時間：「有時都會湧上嚟，佢都想我哋偶然都會想起佢。」

問到達明之後有乜新動向，達哥就話：「真係真係真係錄新專輯喇，有好多歌寫咗喺度，不過就未有詞，希望年底前可以推出。」至於明哥就透露正申請緊場地開騷：「希望喺今年內，但就唔係紅館，會細型啲，因為我哋有個瘋狂嘅idea，但就唔啱喺紅館做，都預計會開好多場。」

問到稍後推出嘅歌會唔會自己填詞，明哥話：「我都有諗過，不過最多都係填一首。」而達哥就笑言：「係呀，人哋填詞要一日，我哋就起碼要一個月。」點知明哥就話：「咩啊！起碼半年啦，其實後生時嘅《馬路天使》我自己有份填，不過之後又忍唔住搵其他人填。」達哥聽完即話：「係呀，因為啲歌詞太核突！」

明哥晚上亦喺facebook開post，再解釋番件事：「很多謝香港電台今次頒這個獎給我們，亦感謝他們在籌備演出的整個過程，對我們的尊重，沒有任何干預，所以有人猜測我們的說話被過濾了，其實是自己被自己過濾——這就是所謂的自我審查。希望有一天我們都毫無掛慮，暢所欲言。」再配以《禁色》歌詞 //願某地方 不需將愛傷害 抹煞內心的色彩 願某日子 不需苦痛忍 將禁色盡染在夢魂外//嚟表達心意。