【校長寄語要捱得】新一輯《全民造星》只准男仔參加 花姐︰女監製鍾意睇男仔

譚詠麟（校長）、組合MIRROR、龍小菌今日在西九文化區出席起步禮，校長透露剛由深圳返港，「我同Sam（許冠傑）今晚做騷，所以今朝趕落嚟，一陣就走，Sam好鍾意排㗎！」還有甚麼地方要巡迴？他說：「我唔知名，我就排到11、12月，由2015年40周年開始，到而家45周年，已經巡迴咗5年。」

提到MIRROR，校長表示當時有收看這個比賽，對於《全民造星》製作第二輯，校長說：「一定係咁，娛樂圈係要一代換一代。」會否叫世姪參與？他笑說：「我啲世姪嘅年紀都幾大吓。」對那位成員的印象較深刻？他說：「簽咗環球嘅涂毓麟(Oscar)(原名:涂心業)，幾靚仔㗎！」有何說話寄語下一代？他謂：「要捱得，娛樂圈千變萬化，碰到唔開心嘅事都唔好放棄，要堅持，唔好怕蝕底。」

獲校長留意的MIRROR，Lokman說：「佢頭先都話睇住我哋大，由第一集睇到而家，我哋都好開心。」校長指做新人要捱得，Lokman續說：「做人本身都要咁，做新人就更加要。」提及將製作新一輯《全民造星》，Lokman即說：「我有朋友第一日已經報名，花姐（《全民造星》監製）我哋做到嘢㗎！」Anson Kong表示：「有3個朋友參加。」在旁的花姐即說：「交數呀！」有甚麼招數傳授給參賽者？Anson Kong笑說：「聽花姐話。」Lokman說：「會分享吓，我覺得係做自己，真人騷係做番自己真實一面，有時又唔可以將最真嗰面攞出嚟，睇吓邊啲真嘅一面好睇，有啲唔係咁好睇嘅真面就收埋少少。」

問到花姐籌備新一輯《全民造星》，她說：「計劃5月開始面試，今次會大型少少，因為我哋預計今年嘅多人數多過上年，參加者嘅年齡要18歲以上，今年一樣有99強先，再分6、7個回合，最後就決賽選冠軍。」只准男士參與？她說：「淨係男仔，因為女監製鍾意睇男仔，我覺得女人睇男人嘅角度係唔同啲，如果今年做女，我會提議公司搵男監製，咁樣會好睇啲。」