【為舊區注入新意】甜/酸/苦/辣輕食配咖啡 上水新開Cafe+藝文空間

提到上水第一時間諗到水貨？其實區內有唔少新舊街坊小店值得支持，最近又有間新店進駐，主打精品咖啡同特色輕食。咖啡有水準之餘，輕食仲有甜酸苦辣四款選擇！新店係一間Cafe同時亦係藝術展覽空間，希望令呢個舊區有更多新元素。

Let It Be位於上水符興街，店名意思就係「隨它吧」，想打造一個輕鬆、客人隨意享受咖啡嘅地方。值得一提小店開朝早7:30，特設即焗牛角包加咖啡嘅早餐（$40），方便上班一族開工前嚟Grab & Go。估唔到仲有老友記熟客，有睇佢哋社交媒體就知道有位婆婆每朝8:00嚟飲咖啡！

Cafe不時會有藝術展覽，開張第一個展覽就係名為「點解」嘅街頭藝術展

Espresso Tonic （$40）

House Blend而家用緊本地烘焙嘅巴西、薩爾瓦多拼配豆，偏堅果風味，中尾段帶果酸。好似呢杯Espresso Tonic就帶檸檬嘅明亮酸味，加上氣泡口感非常醒神。手沖單品豆亦有唔同選擇，會按時令更換。貫徹小店「Let It Be」嘅概念，店主希望大家唔好執著於Tasting Note，而係享受返飲啡嘅過程。

Dark Roasted Oolong Latte （$35）

坊間嘅Cafe嘅茶拿鐵選擇唔多，呢度就有深焙（炭焙）烏龍、淺焙烏龍（鐵觀音）、伯爵茶同茉莉花茶選擇。特別在做法類似抹茶拿鐵，先用茶粉同茶筅攪拌成茶湯，再倒喺牛奶上面。茶味更濃郁、口感亦更濃厚。深焙烏龍拿鐵飲落口感厚滑，茶味香醇、回甘悠長。

Single Origin Dark Chocolate （$42）

單品朱古力就選用印尼品牌嘅Farmer-to-bar朱古力粉沖調，比一般嘅Bean-to-bar更進一步幫助果農栽種優質可可豆。呢杯蘇門答臘70%嘅可可味濃郁，同時仲有類似香蕉嘅甜味！甜度適中，係大人小朋友都會鍾意嘅味道。

煙燻牛肉糖醋苦瓜配酸種麵包 （$48/半份，$63/份）

食物以麵包糕點為主，最特別嘅係四款麵包以甜、酸、苦、辣劃分，最特別嘅當然係呢款坊間少見嘅苦味輕食！其實食落無想象中咁苦，皆因苦瓜先以糖醋減低苦味，食落口感爽脆微酸，後韻先有少少苦味滲出。配搭自家製鹹蛋黃Cream Cheese、肉質軟嫩嘅煙燻牛肉，同嚟自同區ATMA Bakery用自家酸種整嘅黑麥酸種麵包，食到多重味道層次同時又夾到，值得一試。

抹茶白桃貝果（星期五至日供應，$45）

平日有卷蛋（$40）供應，週末仲多埋貝果，同樣都係嚟自ATMA Bakery。抹茶白桃貝果翻熱後切開立即聞到抹茶嘅獨特旨味（Umami）同清香，貝果體煙韌軟熟，裡面有Cream Cheese同白桃粒增加甜香。

Let It Be
地址：上水符興街1號D鋪